!['ഒരു കഥാപാത്രത്തെ അവതരിപ്പിക്കുമ്പോൾ എന്റെ ഒരു അടയാളം കൂടി അവിടെയുണ്ടാക്കാനാണ് ഞാൻ ശ്രമിക്കുന്നത്'; രഞ്ജിത്ത് സജീവ്](http://cf-images.assettype.com/thecue%2F2024-06%2Fdebd32bc-30f9-442c-91f3-6a2989463067%2FBeFunky_collage__79_.jpg?w=480&auto=format%2Ccompress&fit=max)
നവാഗതനായ സംജാദിന്റെ സംവിധാനത്തിൽ രഞ്ജിത്ത് സജീവ്, ദിലീഷ് പോത്തൻ എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രമാണ് ഗോളം. ചിത്രത്തിൽ എ സി പി സന്ദീപ് കൃഷ്ണ എന്ന കഥാപാത്രത്തെയാണ് രഞ്ജിത്ത് സജീവ് അവതരിപ്പിക്കുന്നത്. ഷൂട്ടിന് മുമ്പ് രണ്ടാഴ്ചയോളം നീണ്ട ടേബിൾ റീഡിംങ്ങ് സെക്ഷൻ സന്ദീപ് കൃഷ്ണ എന്ന കഥാപാത്രത്തിലേക്ക് എത്താനും മുഴുവൻ ടീമും തമ്മിൽ ഒരു കെമസ്ട്രി വർക്ക് ചെയ്ത് എടുക്കാനും സഹായിച്ചു എന്ന് നടൻ രഞ്ജിത് സജീവ് പറയുന്നു. മുമ്പ് അഭിനയിച്ച രണ്ട് സിനിമകളിലും സംവിധായകനൊപ്പമിരുന്ന് കഥാപാത്രത്തെ മോൾഡ് ചെയ്തെടുക്കാനുള്ള ശ്രമം ഈ സിനിമയിലും ആവർത്തിച്ചിട്ടുണ്ട് എന്നും ഒരു കഥാപാത്രത്ത അവതരിപ്പിക്കുമ്പോൾ തന്റേതായ ഒരു അടയാളം ആ കഥാപാത്രത്തിൽ കൊണ്ടുവരാൻ ശ്രമിച്ചിട്ടുണ്ട് എന്നും ക്യു സ്റ്റുഡിയോയ്ക്ക് നൽകിയ അഭിമുഖത്തിൽ രഞ്ജിത്ത് സജീവ് പറഞ്ഞു.
രഞ്ജിത്ത് സജീവ് പറഞ്ഞത്:
ഞങ്ങൾ മുഴുവൻ കാസ്റ്റിംഗ് ആന്റ് ക്രൂവിനും രണ്ടാഴ്ചയോളം ഒരു ടേബിൾ റീഡിംങ്ങ് സെക്ഷനുണ്ടായിരുന്നു. ഒരു ടേബിളിന് ചുറ്റുമിരുന്ന് എല്ലാവരും അവരവരുടെ കഥാപാത്രങ്ങളെ കഥാപാത്രമായി നിന്ന് വായിക്കും. കൂടെ സ്പീക്കർ ഒക്കെ വച്ച് മ്യൂസിക്കും പ്ലേ ചെയ്യും. അത് ഒരു മൂഡ് ക്രിയേറ്റ് ചെയ്യും. അത് കഥാപാത്രത്തിലേക്ക് എത്താനും ആ മുഴുവൻ ടീമിന്റെ കെമസ്ട്രി ബിൽഡ് ചെയ്യാനും അത് ഒരുപാട് ഗുണം ചെയ്തിട്ടുണ്ട്. പിന്നെ ഈ സിനിമ മാത്രമല്ല, മെെക്ക് ആണെങ്കിലും ഖൽബാണെങ്കിലും ഞാൻ ഡയറക്ടറിനൊപ്പമിരുന്ന് ഞങ്ങൾ ഒരുമിച്ചാണ് ആ കഥാപാത്രത്തെ മോൾഡ് ചെയ്ത് എടുക്കുന്നത്. ആ രീതിൽ സംജാദും പ്രവീണും എന്നെ ഒരുപാട് സഹായിച്ചു ഈ കഥാപാത്രത്തിന് വേണ്ടി. ഞാൻ ഒരു അഭിനേതാവാണ് എന്റെ കടമ എന്താണെന്നാൽ അവരുടെ കാഴ്ച എന്നിലൂടെ കൊണ്ടുവരിക അത് പ്രേക്ഷകരിൽ എത്തിക്കുക എന്നതാണ്. എന്നെ തെരഞ്ഞെടുക്കാൻ അവർക്കും ഒരു കാരണം ഉണ്ടായിരിക്കുമല്ലോ? അവർ എന്നിൽ എവിടെയോ ആ കഥാപാത്രത്തെ അവതരിപ്പിക്കാനുള്ള പൊട്ടൻഷ്യൽ കണ്ടു. അതിലും എനിക്ക് വിശ്വാസമുണ്ടായിരുന്നു. മാത്രമല്ല ഞാൻ ഒരു കഥാപാത്രത്തെ അവതരിപ്പിക്കുമ്പോൾ എന്റെ ഒരു അടയാളം കൂടി അവിടെയുണ്ടാക്കാനാണ് ഞാൻ ശ്രമിക്കുന്നത്. അത് രണ്ടും ബാലൻസ് ചെയ്താണ് ഈ കഥാപാത്രത്തെ ഞങ്ങൾ മോൾഡ് ചെയ്ത് അവതരിപ്പിക്കാൻ ശ്രമിച്ചിട്ടുള്ളത്.
ദിലീഷ് പോത്തൻ അവതരിപ്പിക്കുന്ന ഐസക് ജോൺ എന്ന കഥാപാത്രം കൊല്ലപ്പെടുന്നതും തുടർന്ന് ആ കൊലപാതകത്തെക്കുറിച്ച് അന്വേഷിക്കാനെത്തുന്ന രഞ്ജിത്ത് സജീവിന്റെ കഥാപാത്രമായ എ സി പി സന്ദീപ് കൃഷ്ണയെയും ചുറ്റിപ്പറ്റിയാണ് നടക്കുന്ന കഥയാണ് ഗോളം. പ്രവീൺ വിശ്വനാഥും സംജാദും ചേർന്ന് രചന നിർവഹിച്ചിരിക്കുന്ന ചിത്രം ഫ്രാഗ്രൻറ് നേച്ചർ ഫിലിം ക്രിയേഷൻസിന് വേണ്ടി ആനും സജീവും ആണ് നിർമിക്കുന്നത്. ചിത്രം ജൂൺ 7 ന് തിയറ്ററുകളിലെത്തും.