റിലീസിനെത്തി മൂന്ന് ദിവസം പിന്നിടുമ്പോൾ ആഗോള ബോക്സ് ഓഫീസിൽ അമ്പത് കോടിയും കടന്ന് പാ.രഞ്ജിത് ചിത്രം തങ്കലാൻ. സ്വാതന്ത്ര്യ ദിനത്തിൽ റിലീസിനെത്തിയ ചിത്രം ആദ്യ ദിനത്തിൽ റെക്കോർഡ് നേട്ടമായിരുന്നു കെെവരിച്ചിരുന്നത്. 13.3 കോടി രൂപയാണ് ആദ്യന്തര ബോക്സ് ഓഫീസിൽ തങ്കലാന്റെ ആദ്യ ദിന കളക്ഷൻ. എന്നാൽ രണ്ടാം ദിനത്തിൽ പിന്നോട്ട് പോയ ചിത്രം മൂന്നാം ദിവസം ശക്തമായ തിരിച്ചു വരവ് നടത്തിയിട്ടുണ്ട്. രണ്ടാം ദിനത്തിൽ ഏകദേശം 4.22 കോടി രൂപയായിരുന്നു തങ്കലാന്റെ ബോക്സ് ഓഫീസ് കളക്ഷൻ എങ്കിൽ പുറത്തു വരുന്ന റിപ്പോർട്ടുകൾ പ്രകാരം ഏകദേശം 14 കോടി രൂപയാണ് തങ്കലാൻ മൂന്നാം ദിനത്തിൽ മാത്രമായി കരസ്ഥമാക്കിയത്. അതിൽ തമിഴ് നാട്ടിൽ നിന്ന് മാത്രം 10 കോടി രൂപയോളം നേടി. ആഭ്യന്തര കളക്ഷനിൽ തങ്കലാൻ ഇതുവരെ 23.8 കോടി രൂപയാണ് നേടിയത് എന്നാണ് പുറത്തു വരുന്ന റിപ്പോർട്ടുകൾ.
വിക്രമിനെ നായകനാക്കി പാ. രഞ്ജിത്ത് സംവിധാനം ചെയ്ത ചിത്രമാണ് തങ്കലാൻ. ബ്രിട്ടീഷ് ഭരണകാലത്ത് കര്‍ണാടകയിലെ കോലാര്‍ ഗോള്‍ഡ് ഫീൽഡിൽ നടന്ന യഥാര്‍ത്ഥ സംഭവങ്ങളെ ആസ്പദമാക്കി ഒരുങ്ങിയ ചിത്രത്തിന് സമ്മിശ്ര പ്രതികരണങ്ങളാണ് തിയറ്ററിൽ നിന്നും ലഭിക്കുന്നത്. സ്റ്റുഡിയോ ഗ്രീന്‍, നീലം പ്രൊഡക്ഷന്‍സിന്റെ ബാനറില്‍ കെ.ഇ ജ്ഞാനവേല്‍ രാജ, പാ. രഞ്ജിത്ത് എന്നിവര്‍ ചേർന്നാണ് ചിത്രം നിർമിക്കുന്നത്. താൻ മുമ്പ് ചെയ്ത ചിത്രങ്ങളിൽ നിന്നും വ്യത്യസ്തമായി ഏറെ പ്രയാസകരമായ ചിത്രമായിരുന്നു തങ്കലാൻ എന്നാണ് മുമ്പ് പാ,രഞ്ജിത് പറഞ്ഞിരുന്നത്. ഒരു അഭിനേതാവെന്ന നിലയില്‍ ഏറ്റവും ആവേശകരമായ ചില അനുഭവങ്ങള്‍ നേടാൻ തങ്കലാനിലൂടെ കഴിഞ്ഞിരുന്നു എന്ന് നടൻ വിക്രവും മുമ്പ് പറഞ്ഞിരുന്നു. ഹിസ്റ്റോറിക്കൽ ആക്ഷൻ ഡ്രാമ വിഭാഗത്തിലെത്തിയ ചിത്രത്തിന്റെ രചന നിർവഹിച്ചിരിക്കുന്നത് പാ രഞ്ജിത്തും തമിഴ് പ്രഭയും ചേർന്നാണ്. തമിഴ്, തെലുഗ്, ഹിന്ദി തുടങ്ങിയ ഭാഷകളിലാണ് ചിത്രം ഇപ്പോൾ റിലീസിനെത്തിയിരിക്കുന്നത്.
പാര്‍വതി തിരുവോത്ത്, മാളവികാ മോഹനന്‍. പശുപതി, ഹരികൃഷ്ണന്‍ അന്‍പുദുരൈ, പ്രീതി കരണ്‍, മുത്തുകുമാര്‍ തുടങ്ങിയവരാണ് ചിത്രത്തിലെ മറ്റ് അഭിനേതാക്കള്‍. ചിത്രത്തില്‍ ഇംഗ്ലീഷ് നടന്‍ ഡാനിയേല്‍ കാല്‍ടാഗിറോണും ഒരു പ്രധാന വേഷത്തിലെത്തുന്നുണ്ട്. 'നച്ചത്തിരം നഗര്‍കിര'താണ് പാ. രഞ്ജിത്തിന്റേതായി ഏറ്റവും ഒടുവില്‍ പുറത്തു വന്ന ചിത്രം. ജിവി പ്രകാശ് കുമാറാണ് ചിത്രത്തിന്റെ സംഗീത സംവിധാനം നിർവഹിക്കുന്നത്.
