കുഞ്ചാക്കോ ബോബനും അരവിന്ദ് സ്വാമിയും ആദ്യമായി ഒന്നിക്കുന്ന 'ഒറ്റ്' സിനിമയുടെ ഫസ്റ്റ് ലുക്ക് പോസ്റ്റർ റിലീസ് ചെയ്തു. തീവണ്ടിക്ക് ശേഷം ഫെല്ലിനി സംവിധാനം ചെയ്യുന്ന സിനിമയാണ് 'ഒറ്റ്'. വിഷു ആശംസകൾ നേർന്ന് കൊണ്ട് കുഞ്ചാക്കോ ബോബന്റെ ഫേസ്ബുക് പേജിലൂടെയാണ് പോസ്റ്റർ റിലീസ് ചെയ്തത്. 'പക്കാ എന്റർടൈനറിനായി ഒരുങ്ങിക്കോ' എന്ന തലക്കെട്ട് നൽകിക്കൊണ്ടാണ് സിനിമയുടെ ഫസ്റ്റ് ലുക് പോസ്റ്റർ റിലീസ് ചെയ്തത്. കുഞ്ചാക്കോ ബോബന്റെയും അരവിന്ദ് സ്വാമിയുടെയും ലുക്കാണ് പോസ്റ്ററിലെ പ്രധാന ആകർഷണം.
മലയാളത്തിന് പുറമെ തമിഴിലും റിലീസ് ചെയ്യുന്ന സിനിമയിൽ രണ്ടകം എന്നാണ് തമിഴ്‍ പതിപ്പിന്റെ പേര്. തെലുങ്ക് നടി ഈശ റബ്ബയാണ് സിനിമയിലെ നായിക. മുംബൈ മുതൽ മംഗലാപുരം വരെയുള്ള യാത്രയ്ക്കിടയിൽ നടക്കുന്ന സംഭവങ്ങളാണ് സിനിമയിൽ അവതരിപ്പിക്കുന്നതെന്ന് സംവിധായകൻ ഫെല്ലിനി ദ ക്യൂവിനോട് പറഞ്ഞിരുന്നു. കഥാപാത്രം ഡിമാൻഡ് ചെയ്തതുകൊണ്ടാണ് സിനിമയിൽ അരവിന്ദ് സ്വാമിയെ കാസറ്റ് ചെയ്തതെന്നും ഫ്രണ്ട്ഷിപ് ബോണ്ടിങ് ആണ് സിനിമയുടെ പ്രമേയമെന്നും ഫെല്ലിനി പറഞ്ഞു.
അരവിന്ദ് സ്വാമിയ്‌ക്കൊപ്പം സ്ക്രീൻ പങ്കിടുന്നതിലെ സന്തോഷം കുഞ്ചാക്കോ ബോബൻ നേരത്തെ സോഷ്യൽ മീഡിയയിലൂടെ പങ്കുവെച്ചിരുന്നു ഓഗസ്റ്റ് സിനിമാസിന്റെ ബാനറില്‍ നടന്‍ ആര്യയും ഷാജി നടേശനും ചേര്‍ന്നാണ് ഒറ്റ് നിര്‍മ്മിക്കുന്നത്. സിനിമ മുംബൈ , ഗോവ, എന്നിവിടങ്ങളിലായിരുന്നു സിനിമയുടെ പ്രധാന ലൊക്കേഷന്‍. എഎച്ച് കാഷിഫ് സംഗീതം നിര്‍വഹിക്കുന്നു. ഛായാഗ്രഹണം വിജയ്.
