സത്യൻ അന്തിക്കാടിന്റെ കൂടെ സിനിമ ചെയ്യുക എന്നത് വലിയ ആഗ്രഹമായിരുന്നുവെന്ന് നടി സംഗീത. മോഹൻലാൽ നായകനാകുന്ന സത്യൻ അന്തിക്കാട് ചിത്രം 'ഹൃദയപൂര്‍വ'ത്തിൽ പ്രധാന വേഷത്തിൽ സംഗീത എത്തുന്നുണ്ട്. 32 വര്‍ഷത്തിന് ശേഷം മോഹന്‍ലാലുമായി ഒന്നിക്കുന്ന ചിത്രത്തെക്കുറിച്ച് തനിക്ക് വളരെ ആകാംക്ഷയുണ്ടെന്നും ചിത്രത്തിൽ വളരെ ബോൾഡ് ആന്റ് പോസിറ്റീവായ ഒരു കഥാപാത്രത്തെയാണ് താൻ അവതരിപ്പിക്കുന്നത് എന്നും സംഗീത ക്യു സ്റ്റുിഡിയോയ്ക്ക് നൽകിയ അഭിമുഖത്തിൽ പറഞ്ഞു.
സംഗീത പറഞ്ഞത്:
എന്റെ ആദ്യ കാലത്ത് എനിക്ക് സത്യൻ സാറിനൊപ്പം സിനിമ ചെയ്യാൻ സാധിച്ചിരുന്നില്ല. ഇപ്പോൾ സത്യൻ സാർ എന്നോട് ഈ സിനിമയെക്കുറിച്ച് സംസാരിച്ചപ്പോൾ എനിക്ക് സന്തോഷം തോന്നി. അപ്പോൾ ഞാൻ അദ്ദേഹത്തോട് പറഞ്ഞു സാറിന്റെ പടം ചെയ്യാൻ എനിക്ക് സന്തോഷമാണെന്ന്. സത്യന്‍ സാറിന്റെ കൂടെ വര്‍ക്ക് ചെയ്യുക എന്നത് വലിയൊരു ആഗ്രഹമായിരുന്നു. മുന്‍പ് അദ്ദേഹത്തിന്റെ ഒരു സിനിമ ഞാന്‍ ചെയ്യേണ്ടിയിരുന്നതായിരുന്നു. ഞാൻ അത് മിസ്സാക്കി. പിന്നീട് ഹൃദയപൂര്‍വത്തിലേക്ക് എന്നെ വിളിച്ചപ്പോള്‍ ഞാന്‍ ഈ കാര്യം അദ്ദേഹത്തോട് പറഞ്ഞിരുന്നു. നമ്മള്‍ ഒരുമിച്ച് വര്‍ക്ക് ചെയ്യേണ്ട സമയത്ത് മാത്രമേ അത് സംഭവിക്കുള്ളൂ എന്നാണ് സത്യന്‍ സാര്‍ പറഞ്ഞത്. അപ്പോഴും അദ്ദേഹം എന്നോട് കഥ പറഞ്ഞിരുന്നില്ല. ഒരു ബോൾഡ് ആന്റ് പോസിറ്റീവ് കഥാപാത്രമാണ് എനിക്കെന്നാണ് എന്നോട് പറഞ്ഞത്. നിങ്ങൾക്കൊരിക്കലും നിരാശപ്പെടേണ്ടി വരില്ലെന്ന് സാർ പറഞ്ഞു. സത്യന്‍ സാര്‍ ഇത്രമാത്രമേ എന്നോട് പറഞ്ഞുള്ളൂ. നാടോടിയിലാണ് ഞാന്‍ ലാലേട്ടനെ ആദ്യമായി കാണുന്നത്. അതിന് ശേഷം പുള്ളിയെ കാണുന്നത് ഇപ്പോഴാണ്. അടുത്ത വര്‍ഷം ജനുവരിയില്‍ ഈ പടത്തിന്റെ ഷൂട്ട് തുടങ്ങും. ബാക്കിയൊന്നും എനിക്കറിയില്ല.
ചിന്താവിഷ്ടയായ ശ്യാമള എന്ന ചിത്രത്തിലൂടെ മലയാളത്തിൽ ശ്രദ്ധേയയായ നടിയാണ് സംഗീത. ഹ്യൂമറിന് പ്രാധാന്യമുള്ള, കുടുംബപ്രേക്ഷകർക്ക് ഇഷ്ടപ്പെടുന്ന ചിത്രമായിരിക്കും ഹൃദയപൂർവ്വം എന്നാണ് മുമ്പ് ചിത്രത്തെക്കുറിച്ച് സത്യൻ അന്തിക്കാട് പറഞ്ഞത്. ഒമ്പത് വർഷങ്ങൾക്ക് ശേഷമാണ് സത്യൻ അന്തിക്കാട് - മോഹൻലാൽ കൂട്ടുകെട്ടിൽ ഒരു ചിത്രം വരുന്നത്. 'നൈറ്റ് ഷിഫ്റ്റ്' എന്ന ഷോര്‍ട്ട് ഫിലിം ഒരുക്കിയ ടി.പി സോനുവിന്റെ തിരക്കഥയിലാണ് ഇക്കുറി സത്യന്‍ അന്തിക്കാട് ചിത്രം ഒരുക്കുന്നത്. അനു മൂത്തേടത്ത് ക്യാമറയും ജസ്റ്റിന്‍ പ്രഭാകരന്‍ സംഗീത സംവിധാനവും നിര്‍വഹിക്കും. എമ്പുരാന് ശേഷം ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മിക്കുന്ന ചിത്രം കൂടിയാണ് ഹൃദയപൂര്‍വം. പൂനെയിലും കേരളത്തിലുമായാണ് സിനിമയുടെ ചിത്രീകരണം നടക്കുക.
