![ലോകോത്തര പ്രതിഭകളെയും കൊച്ചിയുടെ ഫുഡ്ബോൾ ആരാധകരെയും ഒന്നിപ്പിക്കാനായി “ഫോഴ്സാ കൊച്ചി”; കൊച്ചി എഫ്.സിയ്ക്ക് പുതിയ പേര്](http://cf-images.assettype.com/thecue%2F2024-07%2F98c303ad-041b-4d50-a2e8-b2f5560f0c68%2FBeFunky-collage%20(40).png?w=480&auto=format%2Ccompress&fit=max)
കേരളത്തിൻ്റെ പ്രഥമ ഫുട്ബോൾ ലീഗായ സൂപ്പർ ലീഗ് കേരളയുടെ ഭാഗമായ കൊച്ചി എഫ്.സിയ്ക്ക് പുതിയ പേര്. “ഫോഴ്സാ കൊച്ചി” എന്നാണ് പേര് നൽകിയിരിക്കുന്നത്. ഫുട്ബോളിൽ കൊച്ചിയുടെ പുതിയ ശക്തിയെ പരിചയപ്പെടുത്തുന്നതിൽ ഞങ്ങൾക്ക് അതിയായ സന്തോഷമുണ്ട് എന്നാണ് പുതിയ പേര് പ്രഖ്യാപിച്ചു കൊണ്ട് ഫോഴ്സാ കൊച്ചി അറിയിച്ചത്.കുറച്ച് നാളുകൾക്ക് മുമ്പാണ് സൂപ്പർ ലീഗ് കേരളയുടെ ഭാഗമായ കൊച്ചി എഫ്.സിയെ നടൻ പൃഥ്വിരാജും സുപ്രിയ മേനോനും ചേർന്ന് ഏറ്റെടുത്തത്. ഒരു പുതിയ പേരുമായി ഞങ്ങൾ വീണ്ടും കളിക്കളത്തിലേക്ക് ഇറങ്ങുന്നത് പലനാടുകളിലെ ലോകോത്തര പ്രതിഭകളെയും കൊച്ചിയുടെ ഫുഡ്ബോൾ ആരാധകരെയും ഒന്നിപ്പിക്കാനും ഒപ്പം ഒരു പുത്തൻ ചരിത്രം സൃഷ്ടിക്കാനും വേണ്ടിയാണ് എന്ന് ഫോഴ്സാ കൊച്ചി അറിയിച്ചു.
കേരളത്തിലെ ഫുട്ബോളിനെ പ്രൊഫഷണൽ തലത്തിൽ ഉയർത്താനും താഴെക്കിടയിൽ ഫുട്ബോളിനെ വളർത്താനും സൂപ്പർ ലീഗ് കേരളക്ക് കഴിയുമെന്നാണ് കൊച്ചി എഫ്.സിയെ ഏറ്റെടുത്ത് കൊണ്ട് മുമ്പ് പൃഥ്വിരാജ് പറഞ്ഞത്. നാട്ടിലെ മികച്ച ഫുഡ്ബോൾ കളിക്കാർക്ക് നിരവധി അവസരങ്ങൾ സൃഷ്ടിയ്ക്കുന്നതിനൊപ്പം സംസ്ഥാനത്തിൻ്റെ കായിക സമ്പത്തിനെ മെച്ചപ്പെടുത്താൻ ഇത്തരമൊരു അന്താരാഷ്ട്ര ടൂർണമെൻ്റിനാവുമെന്നും അദ്ദേഹം കൂട്ടിച്ചേർത്തിരുന്നു. ആഗോള ഫുട്ബോൾ കളിയാവേശങ്ങൾക്ക് സമാനമായി കേരളത്തിലും വരുന്ന സൂപ്പർ ലീഗ് കേരള പ്രതീക്ഷയോടെയാണ് കാണുന്നതെന്നും ലോകം തന്നെ അത്ഭുത്തത്തോടെ നോക്കുന്ന ഫുട്ബോൾ ആരാധകരുള്ള സ്ഥലമാണ് കേരളം, അവിടെ നടക്കുന്ന ആദ്യ ഫുട്ബോൾ ലീഗിൽ കൂടുതൽ വനിതാ കായിക പ്രേമികളുടെ പ്രാതിനിധ്യം ഉറപ്പാക്കുന്ന പ്രവർത്തനങ്ങൾക്ക് തൻ്റെ പിന്തുണയുണ്ടാകുമെന്ന് സുപ്രിയ മേനോനും അറിയിച്ചിരുന്നു.
നടൻ പൃഥ്വിരാജിൻ്റെ ലീഗിലെ പങ്കാളിത്തം യുവാക്കൾക്കിടയിൽ ടൂർണമെൻ്റിന് വലിയ പ്രചോദനവും ഊർജവും പകരുമെന്ന് സൂപ്പർ ലീഗ് കേരളയുടെ സിഇഒ മാത്യു ജോസഫ് പറഞ്ഞിരുന്നു. ഈ വർഷം ഓഗസ്റ്റ് അവസാനം മുതൽ ആരംഭിക്കുന്ന 60 ദിവസം നീണ്ടുനിൽക്കുന്ന സൂപ്പർ ലീഗ് കായിക കേരളത്തിന് ആവേശമാകുമെന്നും അദ്ദേഹം പറഞ്ഞു. സൂപ്പർ ലീഗ് കേരളയുടെ ഭാഗമായി നടൻ പൃഥ്വിരാജിൻ്റെ സാന്നിധ്യം ലീഗിനെ കൂടുതൽ ആകർഷണീയമാക്കുമെന്നും ലോകമെമ്പാടുമുള്ള മലയാളികൾ ലീഗിൻ്റെ ഭാഗമാകാൻ ഇത് പ്രചോദനമാകുമെന്ന് സൂപ്പർ ലീഗ് കേരള മാനേജിംഗ് ഡയറക്ടർ ഫിറോസ് മീരാൻ പറഞ്ഞു. കൊച്ചി, തിരുവനന്തപുരം, കോഴിക്കോട്, തൃശൂർ, കണ്ണൂർ, മലപ്പുറം എന്നിവിടങ്ങളിലെ ആറ് ടീമുകളാണ് ആദ്യ സീസണിൽ സൂപ്പർ ലീഗിൽ മാറ്റുരയ്ക്കുകയെന്നും അദ്ദേഹം പറഞ്ഞു. ഇത്തരം നിക്ഷേപങ്ങൾ കേരള ഫുട്ബോളിനും നമ്മുടെ സംസ്ഥാനത്തിൻ്റെ കായിക സമ്പദ് വ്യവസ്ഥയ്ക്കും ഉത്തേജനമാണ് എന്നും മറ്റ് വ്യവസായങ്ങളിൽ നിന്നുള്ള കൂടുതൽ പങ്കാളിത്തം കായികരംഗത്തെ അടുത്ത തലത്തിലേക്ക് വളരാൻ സഹായിക്കുമെന്ന് കെഎഫ്എ പ്രസിഡൻ്റ് നവാസ് മീരാൻ അഭിപ്രായപ്പെട്ടു. നസ്ലി മുഹമ്മദ്, പ്രവീഷ് കുഴി പ്പള്ളി, ഷമീം ബക്കർ, മുഹമ്മദ് ഷൈജൽ തുടങ്ങിയവരാണ് കൊച്ചി എഫ്സി ടീമിൻ്റെ സഹ ഉടമകൾ.