ഗിരീഷ് എഡി സംവിധാനം ചെയ്ത നസ്ലെൻ മമിത എന്നിവർ പ്രധാന കഥാപാത്രത്തെ അവതരിപ്പിച്ച ചിത്രം പ്രേമലുവിന്റെ രണ്ടാം ഭാഗം അനൗൺസ് ചെയ്ത് അണിയറ പ്രവർത്തകർ. സംവിധായകൻ ഗിരീഷ് എ.ഡി. ആണ് ഇക്കാര്യം ഔദ്യോഗികമായി സ്ഥിരീകരിച്ചത്. കൊച്ചിയിൽ നടന്ന പ്രേമലുവിന്റെ വിജയാഘോഷ പരിപാടിയിലായിരുന്നു ഗിരീഷ് എഡിയുടെ പ്രഖ്യാപനം.
ഭാവനസ്റ്റുഡിയോസിന്റെ ഏഴാമത്തെ പ്രൊഡക്ഷൻ ചിത്രമായാണ് പ്രേമലു 2 എത്തുന്നത്. സിനിമയുടെ ആദ്യ ഭാഗത്തിലെ അതേ താരനിരയും അണിയറ പ്രവർത്തകരുമാകും രണ്ടാം ഭാഗത്തിലുമെത്തുക. ഭാവന സ്റ്റുഡിയോസ് തന്നെയാണ് ചിത്രത്തിന്റെ രണ്ടാം ഭാഗവും നിർമിക്കുന്നത്. മലയാളത്തിനു പുറമെ തമിഴ്–തെലുങ്ക് ഭാഷകളിലും ഡബ്ബ് ചെയ്യുന്ന ചിത്രം ഒരുമിച്ച് റിലീസ് ചെയ്യാനാണ് സാധ്യത.
ഫെബ്രുവരി ഒൻപതിന് തിയറ്ററുകളിലെത്തിയ ചിത്രമായിരുന്നു പ്രേമലു. ചിത്രം ഗംഭീര വിജയമായതിനെ തുടർന്ന് തെലുങ്കിലും തമിഴിലും ചിത്രം പ്രദർശിപ്പിച്ചിരുന്നു. അവസാനമായി ഒരു സിനിമ കണ്ട് ഇത്രത്തോളം ചിരിച്ചതെന്നാണെന്ന് ഓർമ്മയില്ലെന്നാണ് ചിത്രത്തെക്കുറിച്ച് തെലുങ്ക് സൂപ്പർ താരം മഹേഷ് ബാബു പറഞ്ഞത്. ആദ്യാവസാനം വരെ പ്രേമലു ഒരു ചിരിയുത്സവമാണ് സമ്മാനിച്ചത് എന്നും ചിത്രത്തിലെ ആദി എന്ന കഥാപാത്രത്തെ തനിക്ക് വളരെയധികം ഇഷ്ടപ്പെട്ടു എന്നും സംവിധായകൻ രാജമൗലിയും ചിത്രത്തെക്കുറിച്ച് പറഞ്ഞിരുന്നു.
