തെലുങ്കിൽ ഒടിടി റിലീസിനൊരുങ്ങുന്ന ആദ്യ ബിഗ് ബജറ്റ് ചിത്രം 'വി'യുടെ ട്രെയ്ലർ പുറത്തിറങ്ങി. നാനി കേന്ദ്ര കഥാപാത്രമായി എത്തുന്ന ചിത്രത്തിൽ സുധീർ ബാബു, നിവേത തോമസ്, അദിതി റാവു ഹൈദരി, ജഗപതി ബാബു, വെണ്ണെല കിഷോർ, നാസർ മുഹമ്മദ് എന്നിവരും പ്രധാന വേഷങ്ങളിൽ എത്തുന്നു. മോഹൻ കൃഷ്ണ ഇന്ദ്രഗാന്തിയാണ് ചിത്രം സംവിധാനം ചെയ്യുന്നത്.
നാനിയുടെ 25ാമത് ചിത്രമാണ് 'വി'. നാനി #25 എന്ന ഹാഷ്ടാഗിലാണ് ട്രെയ്ലർ തുടങ്ങുന്നത്. നാനി ആന്റിഹീറോ ഭാവത്തിലെത്തുന്ന ചിത്രം ആക്ഷൻ-ക്രൈം ത്രില്ലറാണ്. വയലൻസിനും ആക്ഷനും പ്രാധാന്യം നൽകുന്നതാണ് ചിത്രത്തിന്റെ ട്രെയ്ലറും.
മാർച്ച് 25ന് തീയറ്റർ റിലീസ് പ്രഖ്യാപിച്ചിരുന്ന ചിത്രം കൊവിഡും ലോക്ഡൗണും പരിഗണിച്ച് മാറ്റിവെയ്ക്കുകയായിരുന്നു. സെപ്റ്റംബർ 5 മുതൽ ആമസോൺ പ്രൈമിൽ സ്ട്രീമിങിന് ഒരുങ്ങുകയാണ് 'വി'. സൂര്യയുടെ 'സൂരരൈ പോട്ര്' ആണ് ആമസോണിൽ റിലീസിനെത്തുന്ന ആദ്യ ബിഗ് ബജറ്റ് തമിഴ് ചിത്രം.
