ഈശോ, കേശു ഈ വീടിന്റെ നാഥന്‍, എന്നീ ചിത്രങ്ങള്‍ക്ക് ശേഷം പുതിയ ചിത്രം സംവിധാനം ചെയ്യാനൊരുങ്ങി നാദിര്‍ഷ. ഷെയിന്‍ നിഗമാണ് നാദിര്‍ഷയുടെ അടുത്ത ചിത്രത്തില്‍ നായകനാവുന്നത്. നിഷാദ് കോയ തിരക്കഥ നിര്‍വ്വഹിക്കുന്ന ചിത്രത്തിന്റെ ഷൂട്ടിങ്ങ് ഈ വര്‍ഷം അവസാനത്തോടെ ആരംഭിക്കുമെന്ന് ഒടിടി പ്ലേ റിപ്പോര്‍ട്ട് ചെയ്യുന്നു. നാദിര്‍ഷ ഈ വര്‍ഷം സംവിധാനം ചെയ്യുന്ന മൂന്നാമത്തെ ചിത്രം കൂടിയാണിത്.
നിലവില്‍ നാദിര്‍ഷ ദിലീപ് ചിത്രമായ കേശു ഈ വീടിന്റെ നാഥന്‍, ജയസൂര്യ ചിത്രം ഈശോ എന്നിവ പൂര്‍ത്തിയാക്കിയിരിക്കുകയാണ്. സജീവ് പാഴൂരിന്റെ തിരക്കഥയിലാണ് കേശു ഈ വീടിന്റെ നാഥന്‍.
അതേസമയം ഷെയിന്‍ നിഗത്തിന്റെ രണ്ട് ചിത്രങ്ങളാണ് റിലീസിന് കാത്തിരിക്കുന്നത്. ടികെ രാജീവിന്റെ ബെര്‍മുഡ, ഭൂതകാലം എന്നീ ചിത്രങ്ങളാണ് ഷെയിന്‍ നിഗത്തിന്റേതായി റിലീസ് ചെയ്യാനിരിക്കുന്നത്. ബര്‍മുഡയില്‍ വിനയ് ഫോര്‍ട്ടും പ്രധാന കഥാപാത്രമാണ്. ഭൂതകാലം എന്ന ചിത്രത്തില്‍ രേവതിക്കൊപ്പമാണ് ഷെയിന്‍ സ്‌ക്രീനിലെത്തുന്നത്.
