'ദൃശ്യം 2', '12th മാൻ', 'റാം' എന്നീ ചിത്രങ്ങൾക്ക് ശേഷം ജീത്തു ജോസഫും മോഹൻലാലും വീണ്ടും ഒന്നിക്കുന്ന ചിത്രം 'നേരി'ലെ മോഹൻലാലിന്റെ ലുക്ക് പുറത്ത് . സമൂഹ മാധ്യമത്തിലൂടെ മോഹൻലാൽ തന്നെയാണ് ലുക്ക് പങ്കിട്ടത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് സിനിമ നിർമിക്കുന്നത്. ആശിർവാദ് സിനിമാസിന്റെ 33-ാമത് നിർമാണ ചിത്രം കൂടിയാണിത്.
ജീത്തു ജോസഫിന്റെ നേരിന്റെ സെറ്റിൽ ജോയിൻ ചെയ്തു എന്ന ക്യാപ്ഷനോടെയാണ് മുണ്ടും ജുബ്ബയും ഉടുത്ത് കറുത്ത ഫ്രെയിമിലുള്ള കണ്ണാടിയും ധരിച്ച് നിൽക്കുന്ന ചിത്രങ്ങൾ മോഹൻലാൽ പോസ്റ്റ് ചെയ്തത്. മോഹൻലാൽ ഇരിക്കുന്നതിന്റെ പുറകുവശത്ത് വക്കീൽ കുപ്പായം അണിഞ്ഞ് നിൽക്കുന്ന മോഹൽലാലിന്റെ യൗവന കാലഘട്ടത്തിലെ ഫോട്ടോകളും കാണാൻ സാധിക്കും. പ്രിയാമണി ആണ് ചിത്രത്തിൽ നായികയായി എത്തുന്നത്. നാല് വർഷങ്ങൾക്ക് ശേഷമാണ് പ്രിയാമണി മലയാളത്തിൽ തിരിച്ചെത്തുന്നത്. ഗ്രാൻഡ് മാസ്റ്ററിന് ശേഷം മോഹൻലാലും പ്രിയാമണിയും വീണ്ടും ഒന്നിക്കുന്ന ചിത്രം കൂടിയാണിത്. സീക്കിങ് ജസ്റ്റിസ് എന്നാണ് സിനിമയുടെ ടാഗ്‌ലൈൻ.
സതീഷ് കുറുപ്പ് ഛായാഗ്രഹണം നിർവഹിക്കുന്ന സിനിമയുടെ സംഗീതം വിഷ്ണു ശ്യാം ആണ്. വി എസ് വിനായക് എഡിറ്റിംഗ് നിർവഹിക്കുന്നു. എക്സിക്യൂട്ടീവ് പ്രൊഡ്യൂസർ ശാന്തി ആന്റണി. ലിറിക്‌സ് : വിനായക് ശശികുമാർ ആർട്ട് : ബോബൻ കോസ്റ്യൂം ഡിസൈനർ : ലിന്റാ ജീത്തു ചീഫ് അസ്സോസിയേറ്റ് ഡയറക്ടർ : സുധീഷ് രാമചന്ദ്രൻ.
റാം ഒന്നാം ഭാഗം ആണ് ജീത്തു ജോസഫ് മോഹൻലാൽ കൂട്ടുകെട്ടിൽ ഇനി പുറത്തിറങ്ങാനിരിക്കുന്ന സിനിമ. ഷൂട്ട് ചെയ്യേണ്ടിയിരുന്ന ലൊക്കേഷനിലെ ക്ലൈമറ്റ് ചേഞ്ച് കാരണം ആണ് ചിത്രം വൈകുന്നതെന്നും ഈ വർഷം അവസാനത്തോടെ ഷൂട്ട് പുനരാരംഭിക്കുമെന്നും ജീത്തു ജോസഫ് ക്യു സ്റ്റുഡിയോയോട് പറഞ്ഞു. മോഹൻലാലിനെ കൂടാതെ തൃഷ, ഇന്ദ്രജിത് സുകുമാരൻ, സംയുക്ത, അനൂപ് മേനോൻ, സിദ്ദിഖ് തുടങ്ങിയവരാണ് റാമിലെ പ്രധാന അഭിനേതാക്കൾ.
