രജിനികാന്തിനെ നായകനാക്കി ടി.ജെ ഞ്ജാനവേല്‍ സംവിധാനം ചെയ്യുന്ന ചിത്രമാണ് വേട്ടയ്യന്‍. ചിത്രത്തിൽ രജിനികാന്തിന്റെ ഭാര്യയുടെ കഥാപാത്രത്തെയാണ് മഞ്ജു വാര്യർ അവതരിപ്പിക്കുന്നത്. ചിത്രത്തിന്റെ ഷൂട്ട് പൂർണ്ണമായും അവസാനിച്ചു എന്നും പോസ്റ്റ് പ്രൊഡക്ഷൻ വർക്കുകളാണ് ഇപ്പോൾ നടക്കുന്നത് എന്നും മഞ്ജു വാര്യർ പറയുന്നു. രജിനികാന്തിനെപ്പോലെ സൂപ്പർ സ്റ്റാറായ ഒരാൾക്കൊപ്പം അഭിനയിക്കുന്നു എന്ന ആവേശത്തെക്കാൾ സംവിധാനകൻ ഞ്ജാനവേലിനൊപ്പം വർക്ക് ചെയ്യാൻ സാധിക്കുന്നതാണ് തനിക്ക് കൂടുതൽ ആവേശം നൽകിയ കാര്യമെന്ന് മഞ്ജു വാര്യർ കൗമുദി മൂവീസിന് നൽകിയ അഭിമുഖത്തിൽ പറഞ്ഞു.
മഞ്ജു വാര്യർ പറഞ്ഞത്:
വേട്ടയ്യന്റെ ഷൂട്ടിംഗ് കഴിഞ്ഞു, ചിത്രത്തിൽ രജിനി സാറിന്റെ ഭാര്യയുടെ കഥാപാത്രമായാണ് ഞാൻ അഭിനയിക്കുന്നത്. ആ ചിത്രം തീർച്ചയായും ഒരു രജിനികാന്ത് പടം തന്നെയാണ്. പക്ഷേ എനിക്ക് അതിൽ ഏറ്റവും കൂടുതൽ ആവേശം തന്നത് ജയ്ഭീം എന്ന ചിത്രത്തിന്റെ മികച്ച സിനിമയുടെ ഡയറക്ടറായ ഞ്ജാനവേല്‍ സാർ ആണ് അതിന്റെ സംവിധാനം. രജിനികാന്ത് എന്ന വലിയൊരു സ്റ്റാറിനോടൊപ്പം അഭിനയിക്കുന്ന അത്രയും തന്നെ അല്ലെങ്കിൽ അതിനെക്കാൾ കൂടുതൽ ആവേശം എനിക്ക് ആ സംവിധായകനൊപ്പം വർക്ക് ചെയ്യുന്നതിലാണ്. കാരണം രസമുള്ള ഒരു സിനിമകൂടിയായിരിക്കുമല്ലോ അത്. പ്രേക്ഷകർ പ്രതീക്ഷിക്കുന്ന ഒരു രജിനികാന്ത് സ്റ്റാർഡത്തിനൊപ്പം തന്നെ ജയ്ഭീം എന്ന് സിനിമയിൽ നമ്മൾ കണ്ട ഒരു ക്വാളിറ്റി ഒരു മിക്സ് തീർച്ചയായും ആ സിനിമയിൽ ഉണ്ടാകും എന്ന് പ്രതീക്ഷിക്കുന്നു. ഷൂട്ടിംഗ് പൂർണ്ണമായും കഴിഞ്ഞിട്ടുണ്ട്. ചിത്രം ഇപ്പോൾ പോസ്റ്റ് പ്രൊഡക്ഷനിലാണ്. ചിത്രത്തിന് വേണ്ടിയുള്ള എന്റെ ഡബ്ബിംഗ് നടന്നിട്ടില്ല ഇതുവരെ. അത് ചെയ്യാൻ പോകുന്നതേയുള്ളൂ.
മഞ്ജു വാര്യർക്കൊപ്പം ഫഹദ് ഫാസിലും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അമിതാഭ് ബച്ചനും രജനികാന്തും വലിയ ഇടവേളക്ക് ശേഷം ഒന്നിച്ച് സ്‌ക്രീനിലെത്തുന്ന ചിത്രം കൂടിയാണ് വേട്ടയ്യൻ. ലെെക പ്രൊഡക്ഷൻസ് നിർമാണ് നിർവഹിക്കുന്ന ചിത്രത്തിൽ റാണ ദഗുബട്ടി, കിഷോര്‍, ഋതിക സിംഗ്, ദുഷാര വിജയന്‍, ജിഎം സുന്ദര്‍, രോഹിണി, എന്നിവരും അഭിനയിക്കുന്നുണ്ട്. അനിരുദ്ധാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. നെൽസൺ ദിലീപ് കുമാർ സംവിധാനം ചെയ്ത ജയിലറാണ് രജിനികാന്തിന്റെതായായി ഏറ്റവും ഒടുവിൽ തിയേറ്ററുകളിലെത്തിയ ചിത്രം.
