വേണു സംവിധാനം ചെയ്യുന്ന പുതിയ ചിത്രം 'കാപ്പ'യില്‍ പൃഥ്വിരാജും മഞ്ജുവാര്യരും ആദ്യമായി മുഴുനീളകഥാപാത്രങ്ങളായി ഒന്നിച്ചെത്തുന്നു. ആസിഫലിയും അന്നബെന്നുമാണ് മറ്റ് താരങ്ങള്‍. സാനു ജോണ്‍ വര്‍ഗീസാണ് ക്യാമറ.
തിരുവനന്തപുരം പശ്ചാത്തലമാക്കിയ ഗുണ്ടാ ഗ്യാംഗുകളുടെ കുടിപ്പകയും കൗതുകം സൃഷ്ടിക്കുന്ന പ്രതികാരനീക്കവുമെല്ലാം ഈ സിനിമയുടെ പ്രമേയമാകും. ജി.ആര്‍ ഇന്ദുഗോപന്റെ ശംഖുമുഖി എന്ന കഥയെ ആധാരമാക്കിയാണ് സിനിമ. ജി ആര്‍ ഇന്ദുഗോപന്‍ തന്നെയാണ് തിരക്കഥ.
ജൂണില്‍ ചിത്രീകരണം നിശ്ചയിച്ചിരുന്ന കാപ്പ കൊവിഡ് രണ്ടാം വ്യാപനത്തെ തുടര്‍ന്ന് മാറ്റി വെക്കുകയായിരുന്നു. ദയ എന്ന പെണ്‍കുട്ടി, മുന്നറിയിപ്പ്, കാര്‍ബണ്‍, ആണും പെണ്ണും എന്ന ആന്തോളജിയിലെ രാച്ചിയമ്മ എന്നീ ചിത്രങ്ങള്‍ക്ക് ശേഷം വേണു സംവിധാനം ചെയ്യുന്ന ചിത്രവുമാണ് കാപ്പ.
ജി ആര്‍ ഇന്ദുഗോപന്റെ 'അമ്മിണിപ്പിള്ള വെട്ടുകേസ്' എന്ന കഥ 'തെക്കന്‍ തല്ല് കേസ്' എന്ന പേരില്‍ സിനിമയാകുന്നുണ്ട്. എന്‍.ശ്രീജിത്താണ് സംവിധാനം. ബിജു മേനോന്‍, പദ്മപ്രിയ, നിമിഷ സജയന്‍, റോഷന്‍ മാത്യു എന്നിവരാണ് കേന്ദ്രകഥാപാത്രങ്ങള്‍. രാജീവ് രവി സംവിധാനം ചെയ്യുന്ന അടുത്ത ചിത്രവും ജി.ആര്‍ ഇന്ദുഗോപന്റെ കഥയുടെ ചലച്ചിത്രരൂപമാണ്. ജോജു ജോര്‍ജ്ജാണ് നായകന്‍. 'പടിഞ്ഞാറേകൊല്ലം ചോരക്കാലം' എന്ന കഥയാണ് രാജീവ് രവിയുടെ സംവിധാനത്തിലൊരുങ്ങുന്നത്.
