ദിലീഷ് പോത്തൻ സംവിധാനം ചെയ്ത 'ജോജി' സിനിമയിലെ നിർണ്ണായക രംഗത്തിന്റെ ഷൂട്ടിംഗ് വീഡിയോ പങ്കുവെച്ച് നടൻ ബാബുരാജ്. ബാബുരാജും ഫഹദ് ഫാസിലും ഒരു സ്കൂട്ടറിൽ യാത്ര ചെയ്യുന്നതിന്റെ ഷൂട്ടിംഗ് വീഡിയോയാണ് സോഷ്യൽ മീഡിയയിൽ പങ്കുവെച്ചിരിക്കുന്നത് . 'തിരിച്ചുവരവില്ലാത്ത യാത്ര' എന്നാണ് ബാബുരാജ് വീഡിയോയ്ക്ക് നൽകിയിരിക്കുന്ന തലക്കെട്ട്. ഈ രംഗത്തിൽ നിന്നുമാണ് നിർണ്ണായകമായ വഴിത്തിരിവുകൾ സിനിമയിൽ ഉണ്ടാകുന്നത്.
ജോമോൻ എന്ന കഥാപാത്രത്തെയാണ് സിനിമയിൽ ബാബുരാജ് അവതരിപ്പിച്ചത്. ബാബുരാജിന്റെ കരിയറിലെ ഏറ്റവും മികച്ച കഥാപാത്രമായാണ് പ്രേക്ഷകർ ജോമോനെ വിലയിരുത്തുന്നത്. ഫഹദ് ഫാസിൽ അവതരിപ്പിക്കുന്ന ജോജിയുടെ മൂത്ത സഹോദരനാണ് സിനിമയിൽ ജോമോൻ.
വില്യം ഷേക്‌സ്പിയറിന്റെ വിഖ്യാത നാടകം ‘മാക്ബത്തി’ല്‍ നിന്ന് പ്രചോദനം ഉള്‍ക്കൊണ്ടാണ് ജോജിയുടെ തിരക്കഥ ഒരുക്കിയിരിക്കുന്നത്. ശ്യാം പുഷ്‌കരന്റേതാണ് തിരക്കഥ. ഷമ്മി തിലകന്‍, ഉണ്ണിമായ പ്രസാദ്, അലിസ്റ്റര്‍ അലക്‌സ് എന്നിവരാണ് അഭിനേതാക്കള്‍. ഷൈജു ഖാലിദ് ക്യാമറയും കിരണ്‍ ദാസ് എഡിറ്റിംഗും. ഭാവന സ്റ്റുഡിയോസാണ് നിര്‍മ്മാണം. ആമസോൺ പ്രൈമിലാണ് സിനിമ റിലീസ് ചെയ്തിരിക്കുന്നത്.
