ബൈസിക്കിള്‍ തീവ്‌സ്, സണ്‍ഡേ ഹോളിഡേ, വിജയ് സൂപ്പറും പൗര്‍ണ്ണമിയും, ഇന്നലെ വരെ എന്നീ സിനിമകള്‍ക്ക് ശേഷം ജിസ് ജോയ് ആസിഫ് അലി കോംബോ വീണ്ടും ഒന്നിക്കുന്ന പുതിയ ചിത്രം പ്രഖ്യാപിച്ചു. ചിത്രത്തില്‍ ബിജു മേനോനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇതുവരെയുള്ള ജിസ് ജോയ് സിനിമകളുടെ ശൈലിയില്‍ നിന്ന് മാറി ഒരു മാസ് ത്രില്ലര്‍ ചിത്രമായിട്ടാണ് ഈ ചിത്രം ഒരുങ്ങുന്നത്.
നവാഗതരായ ആനന്ദ്, ശരത്ത് എന്നിവരാണ് ചിത്രത്തിനായി തിരക്കഥ ഒരുക്കിയിരിക്കുന്നത്. അരുണ്‍ നാരായണ്‍ പ്രൊഡക്ഷന്‍സ് ഇന്‍ അസ്സോസ്സിയേഷന്‍ വിത്ത് ലണ്ടന്‍ സ്റ്റുഡിയോസിന്റെ ബാനറില്‍ അരുണ്‍ നാരായണ്‍, സിജോ സെബാസ്റ്റ്യന്‍ എന്നിവര്‍ ചേര്‍ന്നാണ് ഈ ചിത്രം നിര്‍മ്മിക്കുന്നത്. ഈശോ, ചാവേര്‍ എന്നീ ചിത്രങ്ങള്‍ക്കു ശേഷം അരുണ്‍ നാരായണ്‍ പ്രൊഡക്ഷന്‍സ് നിര്‍മിക്കുന്ന മൂന്നാമത്തെ ചിത്രം കൂടിയാണിത്. ചിത്രത്തിന്റെ ചിത്രീകരണം ഏപ്രില്‍ പതിനേഴ് തിങ്കളാഴ്ച്ച തലശ്ശേരിയില്‍ ആരംഭിക്കും.
ദിലീഷ് പോത്തന്‍,ശങ്കര്‍ രാമകൃഷ്ണന്‍,അനുശ്രീ ,റീനു മാത്യൂസ്, കോട്ടയം നസീര്‍, ദിനേശ് (നായാട്ട് ഫെയിം) അനുരൂപ്, നന്ദന്‍ ഉണ്ണി, ബിലാസ് എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. കലാസംവിധാനം അജയന്‍ മങ്ങാട് കോസ്റ്റ്യൂം ഡിസൈന്‍ നിഷാദ്, മേക്കപ്പ് റോണക്‌സ് സേവ്യര്‍ പിആര്‍ഒ വാഴൂര്‍ ജോസ് പ്രൊഡക്ഷന്‍ കണ്‍ട്രോളര്‍ ആസാദ് കണ്ണാടിക്കല്‍.
