വിനീത് ശ്രീനിവാസന്‍റെ ഹൃദയത്തിലെ ഹിറ്റ് ഗാനങ്ങള്‍ ഒരുക്കിയ സംഗീത സംവിധായകന്‍ ഹിഷാം അബ്ദുല്‍ വഹാബ് തെലുങ്കിലേക്ക്. വിജയ് ദേവരക്കൊണ്ട - സമന്ത താരജോഡികള്‍ ഒന്നിക്കുന്ന ഖുശി എന്ന പുതിയ ചിത്രത്തിന് സംഗീതമൊരുക്കിയാണ് ഹിഷാം തെലുങ്കിലേക്ക് എത്തുന്നത്. നിന്നു കോരി, മജിലി, ടക്ക് ജഗദീഷ് തുടങ്ങിയ ചിത്രങ്ങൾ ഒരുക്കിയ ശിവ നിർവാണയാണ് സംവിധാനം. ചിത്രത്തിലെ ഗാനങ്ങളും പശ്ചാത്തലസംഗീതവും ഒരുക്കുന്നത് ഹിഷാം തന്നെയാണ്.
ഏ.ആർ റഹ്മാൻ, അനിരുദ്ധ് എന്നിവരെയാണ് ചിത്രത്തിലേക്ക് ആദ്യം നിശ്ചയിച്ചിരുന്നതെങ്കിലും അത് ഹിഷാമിലേക്ക് എത്തുകയായിരുന്നു. ചിത്രത്തിലെ ഗാനങ്ങളുടെ കംപോസിങ് ഇതിനോടകം തന്നെ ആരംഭിച്ചുകഴിഞ്ഞു.
ഹൃദയത്തിന് ശേഷം വലിയൊരു ആൽബം ചെയ്യണമെന്ന തന്റെ ആഗ്രഹം ഖുശിയിലൂടെ പൂർത്തീകരിക്കുകയാണ് എന്നാണ് ഹിഷാം വെളിപ്പെടുത്തിയത്. പുഷ്പക്ക് ശേഷം മൈത്രി മൂവി മേക്കേഴ്‌സ് നിർമിക്കുന്ന ബിഗ് ബഡ്ജറ്റ് ചിത്രമാണിത്. കാശ്മീരാണ് പ്രധാന ലൊക്കേഷനാകുന്ന സിനിമ ഡിസംബറിൽ തീയറ്ററുകളിലെത്തും.
