അഭിനേതാക്കളുടെ യൂണിയനായ SAG-AFTRA യ്ക്ക് 150 മില്ല്യൺ വാഗ്ദാനം ചെയത് ഓസ്കർ ജേതാവാവും നടനുമായ ജോർജ് ക്ലൂണിയുടെ നേതൃത്വത്തിലുള്ള എ ലിസ്റ്റ് അഭിനേതാക്കളുടെ ഗ്രൂപ്പ്. അഭിനേതാക്കളുടെ സമരം നൂറാം ദിവസത്തിലേക്ക് കടക്കുമ്പോൾ അത് അവസാനിപ്പിക്കുന്നതിന്റെ ഭാഗമായി ചൊവ്വാഴ്ച സൂം കോളിൽ നടന്ന ചർച്ചയിലാണ് 150 മില്ല്യണിന്റെ ഈ പ്രപ്പോസൽ മുന്നോട്ടുവച്ചത്. മൂന്ന് വർഷത്തിനുള്ളിൽ അഭിനേതാക്കളുടെ യൂണിയന് 150 മില്ല്യൺ ഡോളർ അധികമായി നൽകുമെന്നും മെച്ചപ്പെട്ട ആരോഗ്യ ആനുകൂല്യങ്ങൾക്ക് ധന സഹായം നൽകുമെന്നും ജോർജ് ക്ലൂണിയുടെ വക്താവ് അറിയിച്ചു. കുറഞ്ഞ പ്രതിഫലം വാങ്ങുന്ന അഭിനേതാക്കൾക്ക് പണം ലഭിച്ചതിന്റെ ബാക്കി മാത്രമേ മുൻ നിര താരങ്ങൾ എടുക്കുകയുള്ളൂ എന്നും ക്ലൂണി അറിയിച്ചു.
ജോർജ്ജ് ക്ലൂണി , എമ്മ സ്റ്റോൺ , ബെൻ അഫ്ലെക്ക്, ടൈലർ പെറി , സ്കാർലറ്റ് ജോഹാൻസൺ എന്നിവരുൾപ്പെടെയുള്ള താരങ്ങളുടെ ഒരു കോറം ഫ്രാൻ ഡ്രെഷർ, ഡങ്കൻ ക്രാബ്ട്രീ-അയർലൻഡ് എന്നിവരുൾപ്പെടെ SAG നേതാക്കളുമായി കൂടിക്കാഴ്ച നടത്തിയതായി ഡെഡ്‌ലൈൻ ചൊവ്വാഴ്ച വെളിപ്പെടുത്തി. ഏറ്റവും കൂടുതൽ പ്രതിഫലം വാങ്ങുന്ന പലരും സമരത്തിന് പരിഹാരം കാണുന്നതിന് ഒരു ഭാഗമാകാൻ ആഗ്രഹിക്കുന്നു എന്ന് ഈ വാർത്ത ആദ്യം റിപ്പോർട്ട് ചെയ്ത ഹോളിവുഡ് പബ്ലിക്കേഷനായ ഡെഡ്ലെെനോട് ജോൺ ക്ലൂണി പറ‍ഞ്ഞു. എന്നാൽ അതേ സമയം അഭിനേതാക്കളുടെ യൂണിയൻ ഇതിനോട് പ്രതികരിച്ചിട്ടില്ല.
SAG-AFTRA യിലെ അംഗങ്ങൾ കഴിഞ്ഞ ജൂലെെ മുതൽ പണി മുടക്കിലാണ്. ശനിയാഴ്ച നൂറാം ദിവസത്തിലേക്ക് കടക്കുന്ന പണിമുടക്ക് സിനിമ, ടെലിവിഷൻ നിർമ്മാണത്തെ തടസ്സപ്പെടുത്തുകയും ആയിരക്കണക്കിന് ക്രൂ അംഗങ്ങൾക്കും അഭിനേതാക്കൾക്കും ജോലി നഷ്ടപ്പെടുകയും ചെയ്തു. ഹോളിവുഡിലെ ചലച്ചിത്ര, ടെലിവിഷൻ എഴുത്തുകാർ ഈ മാസം ആദ്യം പുതിയ മൂന്ന് വർഷത്തെ കരാർ അംഗീകരിക്കുകയും 148 ദിവസത്തെ ജോലി നിർത്തിവയ്ക്കൽ അവസാനിപ്പിക്കുകയും ചെയ്തിരുന്നു.
