നടൻ ഗായകൻ എന്നീ നിലകളിൽ പ്രശസ്തനായ വ്യക്തിയാണ് ആയുഷ്മാൻ ഖുറാന. ആയുഷ്മാൻഭവ എന്ന തന്റെ ബാൻഡുമായി അമേരിക്കയിൽ ടൂറിലാണ് ഇപ്പോൾ അദ്ദേഹം. തന്റെ ചൈൽഡ്ഹുഡ് ട്രോമയെക്കുറിച്ച് തുറന്നു പറഞ്ഞിരിക്കുകയാണ് നടൻ ആയുഷ്മാൻ ഖുറാന ഇപ്പോൾ. തന്റെ അച്ഛൻ ഒരു ഏകാധിപതിയെപ്പോലെയായിരുന്നു എന്നും ബെൽറ്റും ചെരുപ്പും ഉപയോഗിച്ച് അദ്ദേഹം തന്നെ അടിക്കുമായിരുന്നു എന്നും ആയുഷ്മാൻ ഖുറാന പറയുന്നു. തന്റെ അച്ഛനെപ്പോലെയല്ല താൻ തന്റെ മക്കളോടെന്നും അതിൽ നിന്നും തീർത്തും വ്യത്യസ്തമായ ഒരച്ഛനാണ് താൻ എന്നും ആയുഷ്മാൻ ഖുറാന പറയുന്നു. ഹോണസ്റ്റ്ലി സേയിംഗ് പോട്കാസ്റ്റിന് നൽകിയ അഭിമുഖത്തിൽ സംസാരിക്കുകയായിരുന്നു ആയുഷ്മാൻ ഖുറാന.
ആയുഷ്മാൻ ഖുറാന പറഞ്ഞത്:
എന്റെ അച്ഛനിൽ നിന്നും തീർത്തും വ്യത്യസ്തനായ ഒരു അച്ഛനാണ് ഞാൻ. എന്റെ അച്ഛൻ ഒരു ഏകാധിപതിയായിരുന്നു. അദ്ദേഹം എന്നെ ഒരുപാട് അടിക്കാറുണ്ടായിരുന്നു. ചെറുപ്പ് കൊണ്ടും ബെൽറ്റ് കൊണ്ടും ഒക്കെ എനിക്ക് അടി കിട്ടിയിട്ടുണ്ട്. എനിക്ക് അദ്ദേഹം എന്റെ ചൈൽഡ്ഹുഡ് ട്രോമയാണെന്ന് ഞാൻ വെറുതെ പറയുന്നതല്ല. ഞാൻ ഒരു ദിവസം പാർട്ടി കഴിഞ്ഞ് തിരിച്ച് വരികയായിരുന്നു. എന്റെ ഷർട്ടിൽ സിഗരറ്റിന്റെ മണമുണ്ടായിരുന്നു. ഞാൻ സിഗരറ്റ് വലിക്കുന്നൊരു ആളായിരുന്നില്ല. പക്ഷേ ഉറപ്പായും ഒരു പാർട്ടിയിൽ പോയി തിരിച്ചു വരുമ്പോൾ വസ്ത്രത്തിൽ ഇത്തരത്തിലുള്ള മണമുണ്ടാകാറുണ്ടല്ലോ? അതിന് എനിക്ക് അദ്ദേഹത്തിൽ നിന്നും നല്ലത് കിട്ടിയിരുന്നു. പണ്ടു മുതലേ ഞാൻ എല്ലാവരോടും പറയുന്നതാണ് ഭായ് എനിക്ക് എന്റെ അച്ഛനെ പേടിയാണ് എന്ന്.
വിക്കി ഡോണർ എന്ന സിനിമ ഇറങ്ങുമ്പോഴേക്കും ഞാനൊരു അച്ഛനായി കഴിഞ്ഞിരുന്നു. ഇരുപത്തിയേഴ് വയസ്സായതേയുണ്ടായിരുന്നുള്ളൂ എനിക്ക് അപ്പോൾ. എനിക്കൊരു മകളാണുണ്ടായത്. കുട്ടികളുണ്ടാവുമ്പോൾ നിങ്ങൾ കുറച്ചു കൂടി മികച്ച മനുഷ്യനായി മാറുകയാണ് ചെയ്യുന്നത്. നമ്മൾ കൂടുതൽ സഹാനുഭൂതിയുള്ളവരാകും. കുട്ടികൾ നമ്മളെ കൂടുതൽ കാര്യങ്ങൾ പഠിപ്പിക്കും. ആയുഷ്മാൻ ഖുറാന കൂട്ടിച്ചേർ‌ത്തു.
ധർമ പ്രൊഡക്ഷൻസിന്റെ ബാന്റിൽ കരൺ ജോഹർ നിർമിക്കുന്ന ചിത്രമാണ് ആയുഷ്മാൻ ഖുറാനയുടേതായി അടുത്തതായി വരാൻ പോകുന്ന പ്രൊജക്ട്. സാറാ അലി ഖാനാണ് ചിത്രത്തിൽ നായിക. മാഡോക്ക് ഫിലിംസ് നിർമിക്കുന്ന ഹൊറർ സിനിമാറ്റിക് യൂണിവേഴ്സിലെ പുതിയ ചിത്രമായ തമ ആണ് ആയുഷ്മാന്റേതായി വരുന്ന മറ്റൊരു ചിത്രം. രശ്മിക മന്ദാന, നവീസുദ്ദീൻ സിദ്ദിഖി, പരേഷ് റാവൽ എന്നിവരാണ് ചിത്രത്തിലെ മറ്റു പ്രധാന വേഷങ്ങളിൽ എത്തുന്നത്.
