ഫാമിലി ഡ്രാമ, ഡാര്‍ക് ഹ്യൂമര്‍, ആക്ഷേപ ഹാസ്യം, ത്രില്ലര്‍ എന്നിങ്ങനെ 4 വ്യത്യസ്ത തരം ജോണറുകള്‍ ഒരേ സമയം കൈകാര്യം ചെയ്യുന്ന അപ്പന്‍ സിനിമയുടെ ഔദ്യോഗിക പോസ്റ്റര്‍ പുറത്തിറങ്ങി. മജു സംവിധാനം ചെയ്യുന്ന ചിത്രത്തില്‍ സണ്ണി വെയിനാണ് കേന്ദ്ര കഥാപാത്രം.
വാര്‍ദ്ധക്യവും അരക്ക് കീഴെ തളര്‍ച്ചയും ബാധിച്ച്, എന്നെന്നേക്കുമായി കട്ടിലില്‍ ജീവിതം തള്ളി നീക്കുന്ന ഒരു വൃദ്ധനായ അപ്പന്റെയും അദ്ദേഹത്തിന്റെ മരണവും സ്വത്തുക്കളും ആഗ്രഹിച്ച് ജീവിക്കുന്ന ഭാര്യയുടേം മക്കളുടെയും മരുമക്കളുടെയും ജീവിതം ചര്‍ച്ച ചെയ്യുന്ന ഒരു ചിത്രമാണ് 'അപ്പന്‍'. ചിത്രത്തില്‍ അലന്‍സിയറാണ് 'അപ്പന്‍' കഥാപാത്രമാവുന്നത്. കുടുംബത്തിന് ശല്യമായൊരു അപ്പന്‍ കഥാപാത്രമാണ് അലന്‍സിയറിന്റേത്.
സണ്ണി വെയ്‌നും ഗ്രെയ്സ് ആന്റണിയും മക്കളുടെ വേഷവും, അനന്യയും വിജിലേഷും മരുമക്കളുടെ വേഷവും ചെയ്യുന്ന ചിത്രത്തില്‍ പോളി വത്സന്‍ അലന്‍സിയറുടെ ഭാര്യയുടെ വേഷം ചെയ്യുന്നു. എല്ലാ പ്രധാന കഥാപാത്രങ്ങളും ചിത്രത്തില്‍ നെഗറ്റീവ് സ്വഭാവമാണ് പുലര്‍ത്തുന്നത് എന്ന പ്രത്യേകതയും ഉണ്ട്. മലയോര കര്‍ഷകരുടെ പശ്ചാത്തലത്തില്‍ ആണ് സിനിമയുടെ കഥ.
തൊടുപുഴയുടെ ഗ്രാമീണ ഭംഗിയില്‍ ചിത്രീകരിച്ച 'അപ്പനി'ല്‍ രാധിക രാധാകൃഷ്ണന്‍ അവതരിപ്പിക്കുന്ന കഥാപാത്രം ഏറെ ശ്രദ്ധേയമാണ്. 2 സംസ്ഥാന അവാര്‍ഡും മികച്ച രണ്ടാമത്തെ ചിത്രത്തിനുള്ള ഫിലിം ക്രിട്ടിക്‌സ് അവാര്‍ഡും ലഭിച്ച പ്രജേഷ് സെന്നിന്റെ 'വെള്ളം' സിനിമക്ക് ശേഷം രഞ്ജിത് മണബ്രക്കാട്ട് നിര്‍മാണം വഹിക്കുന്ന ചിത്രത്തില്‍ ജോസ്‌കുട്ടി മഠത്തില്‍ സഹനിര്‍മാതാവ് ആകുന്നു. ടൈനി ഹാന്‍ഡ്‌സ് പ്രൊഡക്ഷന്‍സിന്റെയും സണ്ണി വെയ്ന്‍ പ്രൊഡക്ഷന്‍സിന്റെയും ബാനറില്‍ ചിത്രം തിയേറ്ററുകളില്‍ എത്തും.
സംവിധായകന്‍ മജുവും ആര്‍ ജയകുമാറും ചേര്‍ന്നാണ് ചിത്രത്തിന്റെ കഥ, തിരക്കഥ, സംഭാഷണം എന്നിവ കൈകാര്യം ചെയ്തിരിക്കുന്നത്. പപ്പു ഛായാഗ്രഹണവും കിരണ്‍ ദാസ് എഡിറ്റിംഗും നിര്‍വഹിച്ച ചിത്രത്തിനായി അന്‍വര്‍ അലി ഒരുക്കിയ വരികള്‍ക്ക് ഡോണ്‍ വിന്‍സെന്റ് സംഗീതസംവിധാനം നിര്‍വഹിച്ചിരിക്കുന്നു. കലാസംവിധാനം: കൃപേഷ് അയ്യപ്പന്‍കുട്ടി, ചമയം: റോണക്സ് സേവിയര്‍. ടൈറ്റില്‍: ഷിന്റോ, ഡിസൈന്‍സ്; മുവീ റിപ്പബ്ലിക്, പി ആര്‍ ഒ: മഞ്ജു ഗോപിനാഥ്, ഡിജിറ്റല്‍ മാര്‍ക്കറ്റിംഗ്: എം ആര്‍ പ്രൊഫഷണല്‍.
