അനാവശ്യമായി മറ്റുള്ളവരുടെ വ്യക്തി ജീവിതത്തെ കുറിച്ച് അഭിപ്രായം പറയുന്നവരെ വിമര്‍ശിച്ച് ഗായിക അമൃത സുരേഷ്. സംഗീത സംവിധായകന്‍ ഗോപി സുന്ദറിനൊപ്പമുള്ള ചിത്രം പങ്കുവെച്ചുകൊണ്ടായിരുന്നു അമൃതയുടെ കുറിപ്പ്.
'മറ്റുള്ളവരുടെ വ്യക്തി ജീവിതത്തെ കുറിച്ച് അനാവശ്യമായി അഭിപ്രായം പറയുകയും ജഡജ് ചെയ്യുകയും ചെയ്യുന്ന ജോലിയില്ലാത്തവര്‍ക്ക് ഞങ്ങള്‍ ഈ പുട്ടും മുട്ടക്കറിയും സമര്‍പ്പിക്കുന്നു', എന്നാണ് അമൃത സാമൂഹ്യമാധ്യമത്തില്‍ കുറിച്ചത്. അമൃതയ്‌ക്കൊപ്പം ഗോപി സുന്ദറും ഇതേ പോസ്റ്റ് പങ്കുവെച്ചിട്ടുണ്ട്.
അടുത്തിടെയാണ് ഇരുവരും സാമൂഹ്യമാധ്യമത്തില്‍ ഒരുമിച്ചുള്ള ചിത്രം പങ്കുവെച്ചത്. അതിന് പിന്നാലെ വലിയ രീതിയിലുള്ള സൈബര്‍ ആക്രമണം ഇരുവര്‍ക്കും നേരിടേണ്ടി വന്നിട്ടുണ്ട്.
കഴിഞ്ഞ ദിവസം അമൃതയുടെ അനിയത്തി അഭിരാമിയും ഇക്കാര്യത്തെ കുറിച്ച് സാമൂഹ്യമാധ്യമത്തില്‍ കുറിപ്പ് പങ്കുവെച്ചിരുന്നു. 'നമുക്ക് വ്യക്തിപരമായി അറിയാത്ത ആളുകളുടെ കഥകളിലേക്കോ സോഷ്യല്‍ മീഡിയയില്‍ നമ്മള്‍ കാണുന്ന കാര്യങ്ങളിലേക്കോ കൂടുതല്‍ ചൂഴ്ന്ന് നോക്കാതിരിക്കുക', എന്നാണ് അഭിരാമി കുറിച്ചത്.
