‘മനോരോഗ’ പ്രസ്താവനയില്‍ ക്ഷമ ചോദിച്ച് ഷെയിന്‍, ‘എന്നെക്കുറിച്ച് പറഞ്ഞ വാക്കുകളൊന്നും ഞാനും മറന്നിട്ടുണ്ടാകില്ല’
രാജ്യാന്തര ചലച്ചിത്രമേളയില്‍ നടത്തിയ പ്രസ്താവനയില്‍ ക്ഷമാപണവുമായി ഷെയിന്‍ നിഗം. നിര്‍മ്മാതാക്കള്‍ക്ക് മനോവിഷമമാണോ, മനോരോഗം ആണോ എന്ന വിവാദ പ്രസ്താവനയിലാണ് ഷെയിന്‍ നിഗത്തിന്റെ ഖേദപ്രകടനം. ഈ പ്രസ്താവനയെ തുടര്‍ന്ന് ഫിലിം പ്രൊഡ്യൂസേഴ്‌സ് അസോസിയേഷനും ഫെഫ്കയും അമ്മയും ചര്‍ച്ചയില്‍ നിന്ന് പിന്‍മാറിയിരുന്നു. ഇതിനുമുമ്പ് പറഞ്ഞ വാക്കുകളൊന്നും ഞാനും പൊതുസമൂഹവും മറന്നിട്ടുണ്ടാകില്ല എന്നാണ് എന്റെ വിശ്വാസമെന്നും അന്ന് ഞാനും ക്ഷമിച്ചതാണ്. അതുപോലെ ഇതും ക്ഷമിക്കും എന്ന പ്രതീക്ഷയിലാണ് താനെന്നും ഷെയിന്‍ നിഗം.
ഷെയിന്‍ നിഗത്തിന്റെ പ്രസ്താവന
കഴിഞ്ഞ ദിവസം തിരുവനന്തപുരത്ത് IFFK വേദിയില്‍ ഞാന്‍ നടത്തിയ പ്രസ്താവന വലിയതോതില്‍ തെറ്റിദ്ധരിക്കപ്പെട്ടു. നിര്‍മ്മാതാക്കളുടെ സംഘടനയിലെ മുഴുവന്‍ അംഗങ്ങള്‍ക്കും മനോരോഗം ഉണ്ടെന്ന് പറഞ്ഞു എന്നതാണ് വാര്‍ത്തകളില്‍ വന്നത്. ദൃശ്യ മാധ്യമ സുഹൃത്തുക്കള്‍ നിര്‍മ്മാതാക്കള്‍ക്ക് മനോവിഷമം ഉണ്ടോ എന്ന ചോദ്യത്തിന് മനോവിഷമം ആണോ മനോരോഗം ആണോ എന്ന് ചോദിച്ചത് സത്യമാണ്. ഞാനെന്റെ രീതിയിലുള്ള ചിരിച്ചുകൊണ്ടുള്ള മറുപടി മാത്രമാണ് നല്‍കിയത്. ഞാന്‍ പറഞ്ഞ ആ വാക്കില്‍ ആര്‍ക്കെങ്കിലും വിഷമം ഉണ്ടെങ്കില്‍ ക്ഷമാപണം നടത്തുന്നു... എന്നെക്കുറിച്ച് ഇതിനുമുമ്പ് പറഞ്ഞ വാക്കുകളൊന്നും ഞാനും പൊതുസമൂഹവും മറന്നിട്ടുണ്ടാകില്ല എന്നാണ് എന്റെ വിശ്വാസം. അന്ന് ഞാനും ക്ഷമിച്ചതാണ്. അതുപോലെ ഇതും ക്ഷമിക്കും എന്ന പ്രതീക്ഷയിലാണ് ഞാന്‍. ക്ഷമയാണ് എല്ലാത്തിനും വലുത് എന്ന് വിശ്വസിക്കുന്നു. ഞാന്‍ ആരാധിക്കുന്ന എന്റെ ദൈവവും ഞാന്‍ വിശ്വസിക്കുന്ന എന്റെ സംഘടനയും എന്നും എന്റെ കൂടെ ഉണ്ടാകും എന്ന് പ്രതീക്ഷിക്കുന്നു. നമുക്ക് ക്ഷമയുടെ പാതയിലൂടെ പോകാം.
ഷെയിന്‍ നിഗത്തിന്റെ പ്രസ്താവന കേരളത്തിലെ ചലച്ചിത്ര നിര്‍മ്മാതാക്കളെ മുഴുവന്‍ അവഹേളിക്കുന്നതാണെന്നും ഇനി ഒത്തുതീര്‍പ്പ് ചര്‍ച്ചയ്ക്ക് സാധ്യതയില്ലെന്നും പ്രൊഡ്യൂസേഴ്‌സ് അസോസിയേഷന്‍ പ്രസിഡന്റ് എം രഞ്ജിത് പ്രതികരിച്ചിരുന്നു. പ്രകോപനപരമായ പ്രസ്താവന തുടരുന്ന സാഹചര്യത്തില്‍ തല്‍ക്കാലം ചര്‍ച്ചകള്‍ വേണ്ടെന്ന് ഫെഫ്കയും അമ്മയും നിലപാടെടുക്കുകയും ചെയ്തിരുന്നു.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
