യുഎഇയില്‍ ഡിസംബറിലേക്കുളള ഇന്ധന വില പ്രഖ്യാപിച്ചു. നവംബറിനെ അപേക്ഷിച്ച് ഇന്ധനവിലയില്‍ കുറവ് രേഖപ്പെടുത്തി. സൂപ്പ‍ർ 98 പെട്രോള്‍ ലിറ്ററിന് 2 ദിർഹം 96 ഫില്‍സാണ് ഡിസംബറിലെ വില. നവംബറില്‍ ഇത് 3 ദിർഹം 03 ഫില്‍സായിരുന്നു. സ്പെഷല്‍ 95 ന് 2. 85 ദിർഹവും ഇ പ്ലസിന് 2.77 ദിർഹവുമാണ് ലിറ്ററിന് നല്‍കേണ്ടത്. നവംബറില്‍ ഇത് യഥാക്രമം 2.92 ദിർഹവും 2.85 ദിർഹവുമായിരുന്നു. ഡീസല്‍ വിലയിലും കുറവുണ്ട്. ഡീസല്‍ വില ലിറ്ററിന് നവംബറില്‍ 3 ദിർഹം 42 ഫില്‍സായിരുന്നുവെങ്കില്‍ ഡിസംബറില്‍ ഇത് 3 ദിർഹം 19 ഫില്‍സായി താഴ്ന്നു.
അതേസമയം എണ്ണ ഉല്‍പാദനം വീണ്ടും കുറയ്ക്കാന്‍ ഒപെക് പ്ലസ് രാജ്യങ്ങളുടെ തീരുമാനമുണ്ടാകുമെന്നാണ് സൂചന. വ്യാഴാഴ്ച നടക്കുന്ന വിർച്വല്‍ മീറ്റിംഗില്‍ ഇക്കാര്യം ചർച്ചയായേക്കുമെന്ന് മാധ്യമങ്ങള്‍ റിപ്പോർട്ട് ചെയ്യുന്നു. ഉല്‍പാദനം 1 ദശലക്ഷം ബാരല്‍ കുറയ്ക്കാനാണ് പ്രാഥമിക തീരുമാനം. സൗദി അറേബ്യയുടെ പ്രതിദിന ഉ്ല്‍പാദനം 1 ദശലക്ഷം ബാരല്‍ വെട്ടിക്കുറച്ചതിന്‍റെയും റഷ്യന്‍ കയറ്റുമതി 3,00,000 ബിപി‍ഡി കുറച്ചതിന്‍റെയും കാലാവധി ഈ വർഷം അവസാനത്തോടെ അവസാനിക്കാനിരിക്കെയാണ് വീണ്ടും ഉല്‍പാദനം കുറയ്ക്കുന്നത് സംബന്ധിച്ച ചർച്ചകള്‍ നടക്കുന്നതെന്നതും ശ്രദ്ധേയം.
