തിരുവോണത്തിനുളള ഒരുക്കങ്ങള്‍ യുഎഇയിലും തകൃതി. ലുലു ഉള്‍പ്പടെയുളള ഷോപ്പിങ് കേന്ദ്രങ്ങളിലെല്ലാം വലിയ തിരക്കാണ് അനുഭവപ്പെടുന്നത്. പൂക്കളും ഓണസദ്യയ്ക്കുളള വിഭവങ്ങളുമെല്ലാം എല്ലായിടത്തും സജ്ജമാണ്.
നാടിന്‍റെ പൈതൃകം വിളിച്ചോതുന്ന അലങ്കാരങ്ങളും രുചിവൈവിധ്യങ്ങളുമാണ് ലുലുവില്‍ ഒരുക്കിയിരിക്കുന്നത്. പഴയിടം മോഹനന്‍ നമ്പൂതിരിയാണ് ഓണം സദ്യ ഒരുക്കുന്നത്. പൂരാടം ദിവസം മുതല്‍ തിരുവോണം വരെ ഓണസദ്യലഭ്യമാകും. വീട്ടില്‍ സദ്യയുണ്ടാക്കുന്നവർക്കായി ഓണക്കിറ്റും ലഭിക്കും.
പായസമേളയില്‍ ഇത്തവണ 27 തരം പായസങ്ങളാണുളളത്. മത്തങ്ങ , ഈന്തപ്പഴം, കാരറ്റ് , മാമ്പഴം, ചക്കപ്പഴം, മില്ലറ്റ് തുടങ്ങി വ്യത്യസ്ഥമായ പായസവിഭവങ്ങളാണ് മധുരപ്രേമികളെ കാത്തിരിക്കുന്നത്. പ്രത്യേക ഷുഗർ ഫ്രീ പായസവും ലഭ്യമാണ്. ഐസ്ക്രീം സ്പെഷ്യൽ പായസം മേളയിലുണ്ടെന്ന് ലുലു അറിയിച്ചു. ഐസ്ക്രീം നെയ്യ് പായസം, ഐസ്ക്രീം അവിൽ പായസവും നവീന രുചികൂട്ടുകള്‍ സമ്മാനിക്കും. പായസം കേക്കുകളും തയാറാക്കിയിട്ടുണ്ട്. പാലട പായസം കേക്ക്, മത്തങ്ങ മിൽക്ക് കേക്ക്, കാരറ്റ് മിൽക്ക് കേക്ക് എന്നിങ്ങനെ നിരവധി വൈവിധ്യങ്ങളാണുള്ളത്.
കൂടാതെ ഗൾഫ് ഓണാഘോഷങ്ങൾക്ക് ആവേശമായി മെഗാ ഓണം മാമാങ്കവും ലുലു സംഘടിപ്പിക്കുന്നുണ്ട്. ഷാർജ എക്സപോ സെന്‍ററില്‍ തിരുവോണ ദിവസം നടക്കുന്ന ഓണം മാമാങ്കം ഒത്തുചേരലിന്‍റെ സൗഹൃദവേദിയായി മാറും. നടൻ ടോവിനോ തോമസ് അടക്കം താരനിരയും ആഘോഷത്തിൽ ഭാഗമാകും.
