7 കോടി സമ്മാനമെന്നറിയിച്ച് ഫോണ്‍ കോള്‍, വിശ്വാസമാകാതെ രതീഷ്, സ്ഥിരീകരിച്ചതോടെ ഞെട്ടല്‍
ദുബായ് ഡ്യൂട്ടി ഫ്രീ നറുക്കെടുപ്പില്‍ മലയാളിക്ക് 10 ലക്ഷം യുഎസ് ഡോളര്‍ (7 കോടി രൂപ) സമ്മാനം. കോട്ടയം കുറവിലങ്ങാട് പഞ്ചമിയില്‍ പി ആര്‍ രതീഷ് കുമാറിനെയാണ് ഭാഗ്യം കടാക്ഷിച്ചത്. ദുബായ് ബിസിനസ് ബേയില്‍ സ്വകാര്യ കമ്പനിയില്‍ അക്കൗണ്ടന്റാണ് രതീഷ്. കഴിഞ്ഞ രണ്ട് വര്‍ഷമായി ദുബായ് ഡ്യൂട്ടി ഫ്രീ നറുക്കെടുപ്പില്‍ ഭാഗ്യം പരീക്ഷിക്കാറുണ്ട്. ഏപ്രില്‍ 2 നാണ് കൂപ്പണ്‍ എടുത്തത്. ഡ്യൂട്ടി ഫ്രീ അധികൃതര്‍ സമ്മാന വിവരമറിയിച്ച് വിളിച്ചപ്പോള്‍ ആദ്യം വിശ്വസിക്കാനായില്ലെന്ന് രതീഷ് പറയുന്നു.
തുടര്‍ന്ന് ഡ്യൂട്ടി ഫ്രീയുടെ ഫെയ്‌സ്ബുക്ക് പേജ് പരിശോധിച്ച് നമ്പര്‍ പരിശോധിച്ച് ഉറപ്പുവരുത്തി. 10 വര്‍ഷമായി രതീഷ് യുഎഇയിലുണ്ട്. രമ്യയാണ് ഭാര്യ.7 കോടി നേട്ടം, ദുബായില്‍ ഒപ്പമുള്ള രമ്യയും ആദ്യം വിശ്വസിച്ചില്ലെന്ന് രതീഷ് പറയുന്നു. കോടികള്‍ സമ്മാനത്തുക ലഭിച്ചെങ്കിലും പ്രവാസം മതിയാക്കുന്നതിനെക്കുറിച്ച് ചിന്തിച്ചിട്ടില്ലെന്നും രതീഷ് വ്യക്തമാക്കുന്നു.
