അമ്മയുടെയും മകന്‍റെയും സ്നേഹത്തിന്‍റെ കഥ പറയുന്ന സംഗീത ആല്‍ബം ‘എ ജേണി ഓഫ് എ റീകോൾഡ് മാൻ പുറത്തിറങ്ങി. നിക്കോൺ മിഡിലീസ്റ്റ് ആൻഡ് ആഫ്രിക്കയുടെ ബാനറിൽ സുൽത്താൻ ഖാൻ സംവിധാനം ചെയ്ത ആൽബം പ്രവാസ ജീവിതത്തിന്‍റെ നൊമ്പരവും അമ്മയും മകനും തമ്മിലുളള ആത്മബന്ധത്തിന്‍റെ ആഴവും ഒരേസമയം വിവരിക്കുന്നു. ദുബായ് ഫെസ്റ്റിവൽ സിറ്റി മാളിലെ നോവോ സിനിമാസിൽ നടന്ന ചടങ്ങിലാണ് ആൽബം പുറത്തിറക്കിയത്. അമ്മമാർക്കുള്ള സ്നേഹാദരമാണ് ഈ സംഗീത ശിൽപമെന്ന് അണിയറപ്രവർത്തകർ പറഞ്ഞു. പൂർണ്ണമായും നിക്കോൺ ഇസഡ് 6- II ക്യാമറകളിൽ ചിത്രീകരിച്ച ഈ ദൃശ്യാവിഷ്കാരത്തിൽ മുഖ്യവേഷത്തിലെത്തുന്നത് യു.എ.ഇയിലെ പ്രമുഖ ഫോട്ടോ ജേണലിസ്റ്റായ കമാൽ കാസിമാണ്.
മാതാവിന്‍റെ സാമിപ്യം നഷ്ടപ്പെട്ട് ദുരിത പ്രവാസം നയിക്കുന്ന മകന്‍റെ വേഷത്തിലാണ് കമാൽ കാസിം എത്തുന്നത്. മാതാവായി തെസ്നിം കാസിം വേഷമിടുന്നു. കഥ, ഛായാഗ്രഹണം എന്നിവ സുൽത്താൻ ഖാൻ നിർവഹിച്ചു. ഒ.എസ്.എ. റഷീദിന്‍റെ വരികൾക്ക് ഖാലിദ് ഈണവും ശബ്ദവും നൽകി. അഭിനയം വേറിട്ടൊരനുഭവമായിരുന്നുവെന്ന് കമാല്‍ കാസിം പറഞ്ഞു. അമ്മയുടെ വേർപാട് അനുഭവിക്കുന്ന സമയത്താണ് യാദൃശ്ചികമായി ഈ ആല്‍ബത്തിന്‍റെ പ്രവർത്തനങ്ങളും നടന്നത്, ഹൃദയം കൊണ്ടാണ് ആല്‍ബത്തിന്‍റെ ഭാഗമായതെന്നും കമാല്‍ കാസിം പറഞ്ഞു.
മേഖലയിലെ ഫോട്ടോഗ്രാഫർമാരുടെയും വീഡിയോഗ്രാഫർമാരുടെയും കഴിവുകളെ പ്രോത്സാഹിപ്പിക്കുന്നതിന്‍റെ ഭാഗമായാണ് ഇത്തരം സംരംഭങ്ങളെന്നും വേറിട്ട ആശയവുമായെത്തുന്നവർക്ക് പിന്തുണ തുടരുമെന്നും നിക്കോൺ മിഡിലീസ്റ്റ് മാനേജിങ് ഡയറക്ടർ നരേന്ദ്ര മേനോൻ പറഞ്ഞു. കലാകാരൻമാരുടെ ക്രിയാത്മകത വളർത്തുക എന്നത് വളരെ പ്രാധാന്യത്തോടെയാണ് പരിഗണിക്കുന്നതെന്നും ദൃശ്യകലാകാരൻമാരെ പിന്തുണക്കുന്നത് കേവലം ബിസിനസായല്ല കാണുന്നതെന്നും അദ്ദേഹം കൂട്ടിച്ചേർത്തു. ഈ ആൽബത്തിനായി തെരഞ്ഞെടുത്ത വിഷയമാണ് കൂടുതൽ ആകർഷിച്ചതെന്ന് സുൽത്താൻ ഖാൻ പറഞ്ഞു. മാതാവിനെ കാണാൻ കൊതിക്കുന്ന നിരവധി പ്രവാസികൾ ഇവിടെയുണ്ട്. അവർക്ക് കൂടിയുള്ള ആദരമാണ് ഈ ആൽബം. നിക്കോൺ നൽകുന്ന ഇത്തരം അവസരങ്ങൾ ഫോട്ടോഗ്രാഫർമാർക്കും വീഡിയോഗ്രാഫർമാർക്കും മുതൽക്കൂട്ടാണെന്നും അദ്ദേഹം കൂട്ടിചേർത്തു. കെ.സി. ഉസ്മാനാണ് ആൽബത്തിന്‍റെ പ്രൊഡക്ഷൻ കോഡിനേറ്റർ. സീനഷ് എസ്. ആനന്ദ്, അർജുൻ ഗോപൻ, അനിൽ ഗോവിന്ദ്, മുഹമ്മദ് തംസീർ, ഇഷ ബക്കർ, മിഗ്ൻ ബൗസിം, ഷെർ ബഹാദർ, അക്ഷയ്, ഗൗരി നായർ തുടങ്ങിയവരും അണിയറയിൽ പ്രവർത്തിച്ചു.
