രക്തസാംപിള്‍ നല്‍കാന്‍ നിര്‍ദേശം; ഡിഎന്‍എ പരിശോധനയ്ക്ക് സമ്മതമറിയിച്ച് ബിനോയ് കോടിയേരി
ലൈംഗിക പീഡനകേസില്‍ ഡിഎന്‍എ പരിശോധനയ്ക്കായി രക്തസാമ്പിളുകള്‍ നല്‍കാന്‍ ബിനോയ് കോടിയേരിക്ക് മുംബൈ, ഓഷിവാര പൊലീസിന്റെ നിര്‍ദേശം. ഡിഎന്‍എ പരിശോധനയ്ക്ക് ബിനോയ് സമ്മതമറിയിച്ചിട്ടുണ്ട്. ഓഷിവാര സ്‌റ്റേഷനിലെത്തിയ ബിനോയിയെ പൊലീസ് ചോദ്യം ചെയ്ത് വിട്ടയച്ചു. പൊലീസ് ആവശ്യപ്പെട്ടാല്‍ ഡിഎന്‍എ പരിശോധനയ്ക്ക് തയ്യാറാകണമെന്ന് മുന്‍കൂര്‍ ജാമ്യം അനുവദിച്ച ദിന്‍ഡോഷി കോടതി നിര്‍ദേശിച്ചിരുന്നു. എല്ലാ തിങ്കളാഴ്ചയും പൊലീസ് സ്റ്റേഷനില്‍ ഹാജരാകണമെന്നും ജാമ്യവ്യവസ്ഥയില്‍ വ്യക്തമാക്കിയിട്ടുണ്ട്.
ഇതുപ്രകാരമാണ് ബിനോയ് സ്‌റ്റേഷനിലെത്തിയത്. മുന്‍കൂര്‍ ജാമ്യം ലഭിച്ചതിന് തൊട്ടുപിന്നാലെ അന്വേഷണ സംഘത്തിന് മുന്‍പാകെ ബിനോയ് ഹാജരായിരുന്നു. തുടര്‍ന്ന് പൊലീസ് അറസ്റ്റ് രേഖപ്പെടുത്തി ജാമ്യത്തില്‍ വിട്ടു. കേസ് നിയമപരമായി നേരിടുമെന്നായിരുന്നു കഴിഞ്ഞ ദിവസം മാധ്യമങ്ങളോടുള്ള ബിനോയിയുടെ പ്രതികരണം. വിവാഹ വാഗ്ദാനം നല്‍കി വര്‍ഷങ്ങളോളം ലൈംഗികമായി പീഡിപ്പിച്ചെന്നും ഈ ബന്ധത്തില്‍ ഒരു കുട്ടിയുണ്ടെന്നുമായിരുന്നു ബിനോയിക്കെതിരായ യുവതിയുടെ പരാതി. ദുബായില്‍ ബാര്‍ ഡാന്‍സറായിരുന്ന ബിഹാര്‍ സ്വദേശിനിയാണ് ബിനോയിക്കെതിരെ മുംബൈ പൊലീസിനെ സമീപിച്ചത്.
