മെഡിക്കല്‍ ടെസ്റ്റിന്റെ ഭാഗമായി വനിതാ ട്രെയിനികളെ നഗ്നരാക്കി ശാരീരിക പരിശോധന നടത്തിയതായി പരാതി. സൂറത്ത് മുന്‍സിപ്പല്‍ കോര്‍പ്പറേഷനിലെ 10 ട്രെയിനികളെയാണ് ആശുപത്രിയില്‍ നഗ്നരാക്കി നിര്‍ത്തി പരിശോധന നടത്തിയത്. പരാതിയില്‍ മുന്‍സിപ്പല്‍ കമ്മീഷണര്‍ അന്വേഷണത്തിന് ഉത്തരവിട്ടു.
ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
അവിവാഹിതകളായ യുവതികളെയും ഗര്‍ഭിണികളാണോയെന്ന പരിശോധനയ്ക്ക് വിധേയമാക്കിയതായും ആരോപണമുണ്ട്. സൂറത്ത് മുന്‍സിപ്പല്‍ ഇന്‍സ്റ്റിസ്റ്റ്യൂട്ട് ഓഫ് മെഡിക്കല്‍ എഡ്യുക്കേഷന്‍ ആന്‍ഡ് റിസര്‍ച്ച് ആശുപത്രിയില്‍ ഇന്നലെയായിരുന്നു സംഭവം.
മുന്‍സിപ്പല്‍ കോര്‍പ്പറേഷനിലെ ക്ലര്‍ക്ക് ട്രെയിനികളാണ് പരിശോധനയ്ക്ക് വിധേയരായവര്‍. ട്രെയിനിംഗ് കാലാവധി പൂര്‍ത്തിയാകുന്നതിന്റെ ഭാഗമായാണ് ശാരീരിക പരിശോധന. ഓരോ സ്ത്രീകളെയായി റൂമില്‍ വിളിച്ച് പരിശോധന നടത്തുന്നതിന് പകരം എല്ലാവരെയും ഡോക്ടര്‍മാര്‍ നഗ്നരാക്കി നിര്‍ത്തിയതിലാണ് എതിര്‍പ്പെന്നാണ് യൂണിയന്‍ നേതൃത്വം പറയുന്നത്. ഇത് നിയമവിരുദ്ധവും മനുഷ്യത്വമില്ലാത്ത നടപടിയാണെന്നും യൂണിയന്‍ ആരോപിച്ചു.
മൂന്നംഗ കമ്മിറ്റിയെയാണ് സംഭവത്തെക്കുറിച്ച് അന്വേഷിക്കാന്‍ ചുമതലപ്പെടുത്തിയിരിക്കുന്നത്. 15 ദിവസത്തിനകം റിപ്പോര്‍ട്ട് സമര്‍പ്പിക്കണം.
