വിദ്വേഷ പ്രസംഗത്തില്‍ പൊലീസ് തിരയുന്ന ജനപക്ഷം നേതാവ് പി.സി ജോര്‍ജ്ജ് പിണറായി വിജയന്റെ പൊലീസീന് പിടികൊടുക്കില്ലെന്ന് മകന്‍ ഷോണ്‍ ജോര്‍ജ്ജ്. വിദ്വേഷ പ്രസംഗം കേസില്‍ പി.സി ജോര്‍ജിന്റെ ജാമ്യാപേക്ഷ തള്ളിയിരുന്നു. പി.സി ജോര്‍ജ് ഒളിവില്‍ അല്ലെന്നും പിണറായിയുടെ പൊലീസിന് അദ്ദേഹം പിടികൊടുക്കില്ലെന്നും ജനപക്ഷം നേതാവ് ഷോണ്‍ ജോര്‍ജ്. മീഡിയ വണ്‍ ചാനലിനോടാണ് പ്രതികരണം.
ഷോണ്‍ ജോര്‍ജ്ജ് പറഞ്ഞത്:
തിരുവനന്തപുരത്തെ കേസിന്റെ വിധി വന്ന ശേഷമേ അറസ്റ്റ് ഉണ്ടാകൂ എന്ന് കൊച്ചി സിറ്റി പോലീസ് കമ്മീഷണര്‍ പറഞ്ഞിരുന്നു. ആ തീരുമാനം ഉടനടി മാറ്റിയത് ഗവണ്‍മെന്റാണ്. കുറേ പേരെ പ്രീണിപ്പിക്കാനുള്ള നീക്കമാണ് പിണറായി സര്‍ക്കാര്‍ നടക്കുന്നത്. വിജയ് ബാബുവിനെ അറസ്റ്റ് ചെയ്യാന്‍ ഈ ആകാംക്ഷയൊന്നും ഈ പൊലീസിന് ഇല്ലല്ലോ.
ഒരു പെണ്‍കുട്ടിയെ പീഡിപ്പിച്ച കേസില്‍ കേരളത്തിലെ എയര്‍പോര്‍ട്ടിലൂടെയാണ് ഒരു സിനിമാ നടന്‍ ദുബായിക്ക് കേറി പോയത്. അത് തടയാനൊന്നും പൊലീസിന് ഉല്‍സാഹമുണ്ടായില്ലല്ലോ. പി.സി ജോര്‍ജിനെ അറസ്റ്റ് ചെയ്യാന്‍ നോക്കുന്നത് പ്രീണന രാഷ്ട്രീയത്തിന്റെ ഭാഗമാണെന്നും ഷോണ്‍ ജോര്‍ജ്. പിണറായിയുടെ രാഷ്ട്രീയമാണ് ഇംപ്ലിമെന്റ് ചെയ്യാന്‍ നോക്കുന്നത്.
