സ്ത്രീകള്‍ക്ക് ലോകത്ത് എവിടെയും അവരുടേതായ സ്ഥാനം ഉറപ്പിക്കാം എന്ന് കാണിച്ചു തരുകയാണ് ശൈലജ ടീച്ചറും ആര്യ രാജേന്ദ്രനുമെന്ന് തമിഴ് നടന്‍ സൂര്യ. ഈ സംസ്ഥാനവും അവിടത്തെ സമൂഹവും അതിനു വഴിയൊരുക്കുകയാണ്. സൂര്യയുടെ റിലീസിനൊരുങ്ങുന്ന 'എതര്‍ക്കും തുനിന്തവന്‍' എന്ന ചിത്രത്തിന്റെ പ്രചാരണപരിപാടികളില്‍ മാധ്യമപ്രവര്‍ത്തകരോട് സംസാരിക്കവെയായിരുന്നു സൂര്യയുടെ പ്രതികരണം.
സ്ത്രീകള്‍ക്ക് ലോകത്ത് എവിടെയും അവരുടേതായ സ്ഥാനം ഉറപ്പിക്കാം എന്ന് കാണിച്ചു തരുകയാണ് ശൈലജ ടീച്ചറും ആര്യ രാജേന്ദ്രനും. ഈ സംസ്ഥാനവും അവിടത്തെ സമൂഹവും അതിനു വഴിയൊരുക്കുകയാണ്. അവര്‍ മുന്നോട്ടുള്ള വഴികാട്ടുന്നു. സ്ത്രീകള്‍ക്ക് പ്രചോദനം നല്‍കുന്ന ഒരു സംസ്ഥാനത്തു വന്ന് നിങ്ങളെ എല്ലാവരെയും കാണാന്‍ കഴിഞ്ഞതില്‍ വലിയ സന്തോഷം. സമൂഹത്തെ നയിക്കുന്നതിലും, മികച്ച സിനിമ ചെയ്യുന്നതിലും കേരളം ഒരു മാതൃകയാണ്.
സൂര്യ
ജയ് ഭീം സിനിമ കണ്ട് ശൈലജ ടീച്ചര്‍ തന്നെ വിളിച്ചിരുന്നെന്നുവെന്നും സൂര്യ പറഞ്ഞു. താന്‍ ഒരുപാട് ബഹുമാനിക്കുന്ന ഒരു വ്യക്തിത്വമാണ് ശൈലജ ടീച്ചര്‍, ടീച്ചര്‍ വിളിച്ചത് തനിക്ക് കിട്ടിയ വലിയ അംഗീകാരമാണെന്നും സൂര്യ കൂട്ടിച്ചേര്‍ത്തു.
കേരളത്തിലെ കുട്ടികളോട് ഏത് ടീച്ചറെയാണ് ഇഷ്ടം എന്ന് ചോദിച്ചാല്‍ മലര്‍ ടീച്ചര്‍ എന്നാവും പറയുക. എന്നാല്‍ എനിക്കിഷ്ടം ശൈലജ ടീച്ചറെയാണ്. ജയ് ഭീം കണ്ട് എനിക്ക് ഏറ്റവും പ്രിയപ്പെട്ട ശൈലജ ടീച്ചര്‍ വിളിച്ചു. അവര്‍ വിളിച്ചത് എനിക്കും എന്റെ ടീമിനും കിട്ടിയ വലിയ അംഗീകാരമാണ്. ഞാന്‍ ഒരിക്കലും പ്രതീക്ഷിക്കാത്തതായിരുന്നു സംഭവിച്ചത്. ഞാന്‍ ഒരു സൂപ്പര്‍സ്റ്റാര്‍ ആയി നോക്കിക്കാണുന്ന ഒരാളാണ് ശൈലജ ടീച്ചര്‍.
സൂര്യ
സണ്‍ പിക്ചര്‍സിന്റെ നിര്‍മാണത്തില്‍ പാണ്ഡിരാജ് സംവിധാനം ചെയ്യുന്ന ചിത്രമാണ് 'എതര്‍ക്കും തുനിന്തവന്‍'. പ്രിയങ്ക മോഹന്‍, സത്യരാജ്, ശരണ്യ പൊന്‍വണ്ണന്‍, വിനയ് രാജ് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രം അഞ്ച് ഭാഷകളിലായാണ് പുറത്തിറങ്ങുന്നത്. സൂര്യയുടെ നാല്‍പ്പതാമത്തെ ചിത്രമാണെന്ന പ്രത്യേകതകൂടി സിനിമക്കുണ്ട്.
