പഠനയാത്രയ്ക്ക് കോഴിക്കോട്ടെത്തിയ രണ്ടു കുട്ടികള്‍ക്ക് രാസലായനി കുടിച്ച് പൊള്ളലേറ്റു. കോഴിക്കോട് വരക്കല്‍ ബീച്ചില്‍ ഉപ്പിലിട്ടത് വില്‍ക്കുന്ന പെട്ടിക്കടയില്‍ നിന്നാണ് ഇവര്‍ രാസവസ്തു കുടിച്ചത്.
കാസര്‍ഗോഡ് തൃക്കരിപ്പൂര്‍ സ്വദേശികളായ മുഹമ്മദ് (14), സാബിദ് (14) എന്നിവര്‍ക്കാണ് പരിക്കേറ്റത്. ഇവരെ കോഴിക്കോട് മെഡിക്കല്‍ കോളേജില്‍ എത്തിക്കുകയായിരുന്നു.
കടയില്‍ നിന്ന് ഉപ്പിലിട്ടത് കഴിച്ചതിന് ശേഷം എരിവ് തോന്നിയ കുട്ടികള്‍ അടുത്തുകണ്ട കുപ്പിയിലെ വെള്ളം കുടിക്കുകയായിരുന്നു. ഇത് കുടിച്ച കുട്ടിയുടെ വായ പൊള്ളി. കുട്ടിയുടെ ഛര്‍ദ്ദില്‍ ദേഹത്ത് തട്ടിയ കുട്ടിക്കും പൊള്ളലേറ്റു.
ഉപ്പിലിട്ടത് വേഗത്തില്‍ പാകമാക്കാന്‍ നഗരത്തില്‍ ആസിഡ് അടക്കമുള്ള രാസവസ്തുക്കള്‍ ഉപയോഗിക്കുന്നുണ്ടെന്ന് പരാതിയുണ്ട്. ഭക്ഷ്യസുരക്ഷ വകുപ്പ് പരിശോധന നടത്തിയേക്കും.
