റിലയന്‍സ് ജിയോക്കെതിരെ പ്രതിഷേധവുമായി പഞ്ചാബിലെ കര്‍ഷകര്‍. നിരവധി സ്ഥലങ്ങളില്‍ ജിയോ ടവറുകളിലേക്കുള്ള വൈദ്യുതി ബന്ധം വിച്ഛേദിച്ചു. സംസ്ഥാനത്തിന്റെ വിവിധ ഭാഗങ്ങളില്‍ കര്‍ഷകര്‍ ഈ രീതിയില്‍ പ്രതിഷേധിച്ചതോടെ ടെലികോം സേവനങ്ങളെ ബാധിച്ചു.
മോദി സര്‍ക്കാരിന്റെ കാര്‍ഷിക നിയമങ്ങളെക്കെതിരെ സമരം ചെയ്യുന്ന കര്‍ഷകര്‍ ജിയോയും റിലയന്‍സും ബഹിഷ്‌കരിക്കാന്‍ ആഹ്വാനം ചെയ്തിരുന്നു. കാര്‍ഷിക നിയമങ്ങള്‍ പിന്‍വലിക്കാതെ ജിയോ ടവറുകളിലേക്കുള്ള വൈദ്യുതി പുനഃസ്ഥാപിക്കില്ലെന്ന നിലപാടിലാണ് കര്‍ഷകര്‍.
അക്രമികളാണ് ടവറുകളിലേക്കുള്ള വൈദ്യുതി ബന്ധം വിച്ഛേദിച്ചതെന്നാണ് പൊലീസ് വിശദീകരണം. ഒറ്റപ്പെട്ട സ്ഥലങ്ങളിലുള്ള ടവറുകള്‍ക്ക് സുരക്ഷ നല്‍കുന്നുണ്ട്. സേവനം പുനഃസ്ഥാപിക്കുന്നതിനായി ജിയോ പൊലീസിന്റെ സഹായം തേടിയിരുന്നു. ആവശ്യമായ നടപടി സ്വീകരിക്കാന്‍ പൊലീസിന് നിര്‍ദേശം നല്‍കിയിട്ടുണ്ടെന്നാണ് വിശദീകരണം.
