കൊവിഡ് വ്യാപനത്തിന്റെ പശ്ചാത്തലത്തില്‍ സംസ്ഥാനത്ത് ഇന്നുമുതല്‍ രാത്രികാല കര്‍ഫ്യൂ ആരംഭിക്കും. രാത്രി 10 മുതല്‍ രാവിലെ 6 മണി വരെയാകും നിയന്ത്രണം. കര്‍ഫ്യൂ സമയത്ത് സഞ്ചാരം കര്‍ശനമായി തടയും.
എന്നാല്‍ വിമാനം, ട്രെയിന്‍, ദീര്‍ഘദൂര സര്‍വീസുകള്‍ നടത്തുന്ന പൊതുഗതാഗത സംവിധാനങ്ങള്‍ തുടങ്ങിയവയില്‍ യാത്ര ചെയ്യുന്നവര്‍ക്ക് തടസമുണ്ടാകില്ല. ആശുപത്രിയാത്ര, ചരക്ക് വാഹനങ്ങള്‍, അവശ്യ മേഖല, സേവന മേഖലയിലുള്ളവര്‍, മരണത്തെ തുടര്‍ന്നുള്ള യാത്ര എന്നിവയ്ക്കും ഇളവുണ്ടാകും.
കൊവിഡ് വ്യാപന തോത് കൃത്യമായി കണ്ടെത്താന്‍ സംസ്ഥാനത്ത് വ്യാപക പരിശോധന നടത്താനും തീരുമാനമായിട്ടുണ്ട്. സാമൂഹിക സമ്പര്‍ക്കത്തിന് സാധ്യതയുള്ള സ്ഥലങ്ങളില്‍ രോഗലക്ഷണങ്ങളില്ലെങ്കിലും ആന്റിജന്‍ പരിശോധന നടത്തും.
