നടിയെ ആക്രമിച്ച കേസുമായി ബന്ധപ്പെട്ട് ദിലീപിന്റെ പുതിയ ശബ്ദരേഖ പുറത്ത്. ദിലീപിന്റെ സുഹൃത്ത് ബൈജു ചെങ്ങമനാടുമായി സംസാരിച്ചതിന്റെ ശബ്ദരേഖയാണ് പുറത്ത് വന്നിരിക്കുന്നത്. ഇത് വേറെ പെണ്ണ് അനുഭവിക്കേണ്ട ശിക്ഷയാണെന്നും അവരെ രക്ഷിച്ചതിന് താന്‍ ശിക്ഷിക്കപ്പെട്ടെന്നുമാണ് സംഭാഷണത്തില്‍ ദിലീപ് പറയുന്നത്.
2017ല്‍ നടന്നതാണ് ഈ സംഭാഷണമെന്ന നിഗമനത്തിലാണ് അന്വേഷണ സംഘം. എന്നാല്‍ തന്റെ ശബ്ദമല്ല ഇതെന്ന് ദിലീപ് അന്വേഷണ സംഘത്തിന് മൊഴി നല്‍കി.
ഈ ശബ്ദരേഖ അന്വേഷണ സംഘം കോടതിയില്‍ സമര്‍പ്പിച്ചിരുന്നുവെന്നാണ് റിപ്പോര്‍ട്ടുകള്‍. ശബ്ദരേഖ ഔദ്യോഗികമായി സ്ഥിരീകരിക്കാന്‍ ഫൊറന്‍സിക് പരിശോധനയ്ക്ക് അയച്ചിട്ടുണ്ട്.
