ജനങ്ങള്‍ക്ക് മുന്നില്‍ സ്വീകാര്യതയുണ്ടായ മറ്റൊരു സര്‍ക്കാര്‍ കേരളത്തിന്റെ ചരിത്രത്തിലില്ലെന്ന് സി.പി.എം സംസ്ഥാന സെക്രട്ടറി എ.വിജയരാഘവന്‍. ജനങ്ങള്‍ക്ക് മുന്നില്‍ സി.പി.എമ്മിനെ ബുദ്ധിമുട്ടിലാക്കുന്ന ഒരുകാര്യവും ഈ സര്‍ക്കാര്‍ ചെയ്തിട്ടില്ല. ജനങ്ങളുടെ മനസില്‍ സര്‍ക്കാനുള്ള സ്ഥാനം വിവാദങ്ങളുണ്ടാക്കി ഇളക്കാന്‍ ശ്രമിക്കുന്നവര്‍ക്ക് നിരാശപ്പെടേണ്ടി വരുമെന്നും കൗമുദി ചാനലിന് നല്‍കിയ അഭിമുഖത്തില്‍ എ.വിജയരാഘവന്‍ വ്യക്തമാക്കി.
സര്‍ക്കാര്‍ കേരളത്തിലെ ഇടതുപക്ഷ പ്രസ്ഥാനത്തിന്റെ ഏറ്റവും വലിയ ആത്മവിശ്വാസമാണ്. ആ നിലയില്‍ പ്രവര്‍ത്തിക്കുന്ന സര്‍ക്കാരാണ്. സര്‍ക്കാരിനെയും പ്രതിച്ഛായയെയും നല്ല പ്രവര്‍ത്തനങ്ങളെയും ജനങ്ങള്‍ക്ക് മുന്നിലെത്തിക്കാനുമൊക്കെ പാര്‍ട്ടിയാണ് പ്രവര്‍ത്തിക്കുക. ജനങ്ങള്‍ക്ക് മുന്നില്‍ സി.പി.എമ്മിനെ ബുദ്ധിമുട്ടിലാക്കുന്ന ഒരുകാര്യവും ഈ സര്‍ക്കാര്‍ ചെയ്തിട്ടില്ല.
സര്‍ക്കാരിന്റെ മേല്‍ കരിയും ചളിയും പുരട്ടാന്‍ ബോധപൂര്‍വ്വമായ ശ്രമം നടക്കും. ആ പരിശ്രമങ്ങളില്‍ നിന്നും പല വിവാദങ്ങളും ഉണ്ടാക്കാന്‍ ശ്രമിക്കും. അതൊന്നും വിഷയമല്ല. സര്‍ക്കാരിന്റെ മൊത്തത്തിലുള്ള പ്രവര്‍ത്തനങ്ങളെയാണ് നോക്കുക. സര്‍ക്കാര്‍ എങ്ങനെ പ്രവര്‍ത്തിച്ചുവെന്നും ആര്‍ക്കാണ് അതിന്റെ ഗുണമുണ്ടായതെന്നുമാണ് നോക്കുക. ആ ചോദ്യത്തിന്റെ ഉത്തരം വളരെ കൃത്യമാണ്. ഏറ്റവും പാവപ്പെട്ട മനുഷ്യര്‍ക്കാണ് പ്രയോജനം ലഭിച്ചത്. അവരുടെ മനസിലാണ് സര്‍ക്കാരിന്റെ സ്ഥാനമെന്നും എ.വിജയരാഘവന്‍ പറഞ്ഞു.
