സംസ്ഥാനത്ത് കൊവിഡ് രോഗികളുടെ എണ്ണം ആറായിരം കടന്നു. 6324 പേര്‍ക്ക് കൊവിഡ് സ്ഥിരീകരിച്ചു. 5321 പേര്‍ക്ക് സമ്പര്‍ക്കം വഴിയാണ് രോഗം ബാധിച്ചിരിക്കുന്നത്. സംസ്ഥാനത്ത് അതീവ ഗുരുതര സാഹചര്യമാണെന്ന് മുഖ്യമന്ത്രി പിണറായി വിജയന്‍ പറഞ്ഞു.
കൊവിഡ് ബാധിച്ച് 21 പേര്‍ മരിച്ചു. ഇതോടെ മരണം 613 ആയി. കോഴിക്കോട് ജില്ലയിലാണ് ഏറ്റവും കൂടുതല്‍ പേര്‍ക്ക് രോഗം സ്ഥിരീകരിച്ചത്. 883 പേര്‍ക്ക് പോസിറ്റീവായി. തിരുവനന്തപുരം 875, മലപ്പുറത്ത് 761 പേര്‍ക്കും രോഗം സ്ഥിരീകരിച്ചു.
ഇന്ന് രോഗം ബാധിച്ചവരില്‍ 628 പേരുടെ ഉറവിടം കണ്ടെത്താനായിട്ടില്ല. 105 ആരോഗ്യ പ്രവര്‍ത്തകര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. തിരുവനന്തപുരം 28, കണ്ണൂര്‍ 19, കാസര്‍ഗോഡ് 13, മലപ്പുറം 9, തൃശൂര്‍ 8, എറണാകുളം, കോഴിക്കോട് 7 വീതം, പത്തനംതിട്ട 6, വയനാട് 4, ആലപ്പുഴ 2, കൊല്ലം, പാലക്കാട് 1 വീതം ആരോഗ്യ പ്രവര്‍ത്തകര്‍ക്കാണ് ഇന്ന് രോഗം ബാധിച്ചത്.
