യഥാർത്ഥ ജീവിതത്തിൽ മുറിവേറ്റാൽ എങ്ങനെ ഉണ്ടാകും എന്ന് ചിന്തിച്ചാണ് 'ബ്ലാക്ക്' എന്ന ചിത്രത്തിലെ കുത്തേറ്റ് മരിക്കുന്ന രം​ഗം അഭിനയിച്ചത് എന്ന് നടൻ റഹ്മാൻ. മമ്മൂട്ടിയെ നായകനാക്കി 2004 ൽ രഞ്ജിത് സംവിധാനം ചെയ്ത ചിത്രമാണ് 'ബ്ലാക്ക്'. ചിത്രത്തിൽ സബ് ഇൻസ്പെക്ടർ അശോക് ശ്രീനിവാസ് എന്ന പൊലീസ് ഉദ്ധ്യോ​ഗസ്ഥനെയാണ് റഹ്മാൻ അവതരിപ്പിച്ചത്. ഒരു കുത്ത് കൊള്ളുന്ന സീൻ എടുക്കുമ്പോൾ ആ ബ്ലേഡ് സത്യത്തിൽ തന്റെ ശരീരത്തിനകത്തേക്ക് പോയാൽ എന്തു സംഭവിക്കും എന്ന് ചിന്തിച്ചാണ് താൻ ഒരു സീസിന് വേണ്ടി മാനസികമായി തയ്യാറെടുക്കാറുള്ളത് എന്ന് റഹ്മാൻ പറയുന്നു. അത്തരത്തിൽ ചിന്തിക്കുമ്പോഴാണ് തനിക്ക് അഭിനയിക്കാൻ സാധിക്കുന്നതെന്നും ഒരു സിനിമയിലെ അതേ സ്റ്റൈൽ അടുത്ത സിനിമയിലും ആവർത്തിക്കാതിരിക്കാൻ താൻ ശ്രമിക്കാറുണ്ടെന്നും റഹ്മാൻ ക്യു സ്റ്റുഡിയോയ്ക്ക് നൽകിയ അഭിമുഖത്തിൽ പറഞ്ഞു.

റഹ്മാൻ പറഞ്ഞത്:

'ബ്ലാക്കി'ൽ എന്റെ കഥാപാത്രം മരിക്കുന്ന സീൻ ഷൂട്ട് ചെയ്യുന്ന സമയത്ത് ഞാൻ ഒരുപാട് ടെൻഷനടിച്ചിരുന്നു. എങ്ങനെ ആ സീനിന് വേണ്ടി തയ്യാറെടുക്കുമെന്ന് ഞാൻ വളരെ ആഴത്തിൽ ചിന്തിച്ചു. ഞാൻ ഒരു സീനിന് വേണ്ടി തയ്യാറെടുക്കുന്ന രീതിയാണ് ഞാൻ പറയുന്നത്. ഒരു കുത്ത് കൊള്ളുന്ന സീൻ എടുക്കുമ്പോൾ ആ ബ്ലേഡ് സത്യത്തിൽ അകത്ത് പോയാൽ എനിക്ക് എങ്ങനെയുണ്ടാവും എന്ന് ഞാൻ ആലോചിക്കും. എന്തായിരിക്കും അതിന്റെ വേദന. ആ വേദന ആ വേദനയുണ്ടാക്കുന്ന ഫീൽ, ഒരാൾ നമ്മളെ കുത്തിക്കഴിയുമ്പോൾ നമ്മൾ ഒച്ചയുണ്ടാക്കുമോ അതോ നിശബ്ദമായി പോകുമോ അങ്ങനെയൊക്കെ ഞാൻ ചിന്തിക്കാറുണ്ട്. ആ നിമഷത്തെക്കുറിച്ച് അത്തരത്തിൽ ചിന്തിക്കുമ്പോഴാണ് എനിക്ക് അങ്ങനെ അഭിനയിക്കാൻ സാധിക്കുന്നത്. മാത്രമല്ല ഞാൻ മുമ്പ് ചെയ്ത അതേ കാര്യം വീണ്ടും മറ്റൊരു സിനിമയിൽ ഞാൻ ആവർത്തിക്കാൻ ശ്രമിക്കാറില്ല, മറ്റൊരു പടത്തിലും ഒരു പക്ഷേ ഞാൻ ഇതുപോലെ മരിക്കുന്നുണ്ടാവാം. അതിൽ നിന്നും വ്യത്യസ്തമായി വേറൊരു സ്റ്റൈൽ പിടിക്കാം എന്നാണ് വിചാരിക്കാറുള്ളത്.

നടന്‍ റഹ്‌മാന്‍ ഭാഗമാകുന്ന ആദ്യത്തെ വെബ് സീരീസ് 1000 ബേബീസ് ഒടിടിയിൽ മികച്ച അഭിപ്രായങ്ങൾ നേടി മുന്നേറുകയാണ്. നജീം കോയ സംവിധാനം ചെയ്യുന്ന മലയാളം ത്രില്ലര്‍ സീരിസാണ് ഇത്. കുഞ്ഞുങ്ങളുടെ കൂട്ടമരണവും അതിനെ തുടര്‍ന്നുള്ള കേസ് അന്വേഷണവുമാണ് സീരിസിന്റെ പ്രമേയം. ഡിസ്നി പ്ലസ് ഹോട്ട്സ്റ്റാറിന്റെ അഞ്ചാമത്തെ മലയാളം ഒറിജിനല്‍ സീരീസാണ് '1000 ബേബീസ്'. ഹിന്ദി നടിയും സംവിധായികയുമായ നീന ഗുപ്ത ഏറെ കാലത്തിന് ശേഷം മലയാളത്തില്‍ തിരിച്ചെത്തുന്നു എന്ന പ്രത്യേകതയും ഈ സീരീസിനുണ്ട്. ഓഗസ്റ്റ് സിനിമയുടെ ബാനറില്‍ ഷാജി നടേശനും നടന്‍ ആര്യയും ചേര്‍ന്നാണ് സീരീസ് നിര്‍മ്മിച്ചിരിക്കുന്നത്. നജീം കോയയും അറൗഫ് ഇര്‍ഫാനും ചേര്‍ന്നാണ് രചന നിര്‍വഹിച്ചിരിക്കുന്നത്. മലയാളം, തമിഴ്, തെലുഗു, കന്നഡ, മറാത്തി, ഹിന്ദി, ബംഗാളി എന്നീ ഭാഷകളിലായി സീരീസ് ഹോട്ട്സ്റ്റാറിൽ ലഭ്യമാണ്.