‘പ്രപഞ്ചത്തിൽ അമ്മയേക്കാൾ വലിയ പോരാളി മറ്റാരുമില്ല’ എന്ന ​ഡയലോ​ഗും സീനും കെജിഎഫിൽ ആദ്യമുണ്ടായിരുന്നതല്ലെന്ന് നടൻ യഷ്. പ്രശാന്ത് നീൽ സംവിധാനം ചെയ്ത് യഷ് പ്രധാന കഥാപാത്രമായി എത്തിയ ചിത്രമായിരുന്നു കെജിഎഫ്. ചിത്രത്തിൽ റോക്കി ഭായ് എന്ന കഥാപാത്രമായാണ് യഷ് എത്തിയത്. ചിത്രത്തിലെ ഏറ്റവും ആഘോഷിക്കപ്പെട്ട അമ്മയെക്കുറിച്ചുള്ള ഡയലോ​ഗ് പിന്നീട് തങ്ങൾ റീ ഷൂട്ട് ചെയ്തതാണെന്ന് യഷ് പറയുന്നു. ദി ഹോളിവുഡ് റിപ്പോര്‍ട്ടര്‍ ഇന്ത്യയ്ക്ക് നല്‍കിയ അഭിമുഖത്തിൽ സംസാരിക്കവേയാണ് യഷ് ഇക്കാര്യം പറഞ്ഞത്.

യഷ് പറഞ്ഞത്:

ഞാനും പ്രശാന്തും കൂടെ ചിത്രത്തിൻ്റെ എഡിറ്റിംഗ് കാണുകയായിരുന്നു. അതിലെ അമ്മയടെ സീൻ വളരെ ഫേമസായ ആ ബൺ സീൻ അത് അമ്മയുമായി ആയിരുന്നില്ല. ബണ്ണുമായി റോഡ് ക്രോസ് ചെയ്യാൻ നിൽക്കുന്നൊരു വൃദ്ധയായിരുന്നു സീനിൽ. ഞാൻ തോക്കെടുക്കുന്ന രം​ഗമാണ് അവിടെ വരാനിരുന്നത്. അപ്പോഴാണ് ഞങ്ങളുടെ എക്സിക്യൂട്ടീവ് പ്രൊഡ്യൂസർ ശ്രീ രാമറാവു പെട്ടെന്ന് വന്നു പറഞ്ഞത്. ഈ സിനിമ മുഴവൻ അമ്മയെക്കുറിച്ചാണ് പിന്നെന്തുകൊണ്ട് ഈ സീൻ അമ്മയില്ല എന്ന്. പെട്ടെന്ന് ഞാനും പ്രശാന്തും പരസ്‌പരം നോക്കി. കാരണം അത്രയും മികച്ചൊരു ആശയമായിരുന്നു അത്.ഇനി എന്തു ചെയ്യുമെന്ന് ഞങ്ങൾ ആലോചിച്ചു. കുഴപ്പമില്ല, ഞാൻ ഈ ബ്ലോക്ക് മുഴുവൻ മാറ്റാമെന്നും വീണ്ടും ഷൂട്ട് ചെയ്യാമെന്നും പ്രശാന്ത് പറഞ്ഞു. സീൻ മാറ്റുന്ന കാര്യം നിർമാതാവിനോട് പറഞ്ഞു ഞാൻ സമ്മതിപ്പിച്ചു. അങ്ങനെയാണ് ഞങ്ങൾ ഒരു ചെറിയ കുട്ടിയേയും എടുത്ത് വരുന്ന സ്ത്രീയെ സീനിലേക്കെത്തിച്ചത്. ആ സ്‍ത്രീയെ കണ്ട് റോക്കി തൻ്റെ അമ്മയെ ഓർക്കുകയാണ്. റോക്കി കാറിൽ നിന്നിറങ്ങി അവളുടെ അടുത്തേക്ക് പോകുന്നു ഡയലോ​ഗ് പറയുന്നു. 'പ്രപഞ്ചത്തിൽ അമ്മയേക്കാൾ വലിയ പോരാളി മറ്റാരുമില്ല' എന്ന ഡയലോ​ഗ് അങ്ങനെയാണ് വന്നത്. ഒരുപാട് ചർച്ചയ്ക്ക് ഒടുവിലാണ് ആ ഡയലോ​ഗ് ഞങ്ങൾക്ക് കിട്ടിയത്. 2014 മുതൽ ഞങ്ങൾ ചർച്ച ചെയ്തു കൊണ്ടിരുന്ന സിനിമയാണ് അത്. പക്ഷേ ഞങ്ങൾക്ക് ആർക്കും തോന്നാത്ത ഒരു ആശയം പ്രൊഡക്ഷനിൽ ഇരിക്കുന്ന ഒരാളാണ് ഞങ്ങളോട് പറഞ്ഞത്. ആശയം നല്ലതാണെങ്കിൽ നമ്മൾ അത് സ്വീകരിക്കുകയാണ് ചെയ്യുന്നത്.

ഗീതു മോഹൻദാസിന്റെ സംവിധാനത്തിൽ യഷ് പ്രധാന കഥാപാത്രമായി എത്തുന്ന 'ടോക്സികി'ന്റെ ചിത്രീകരണം ഇപ്പോൾ നടന്നു കൊണ്ടിരിക്കുകയാണ്. പീക്കി ബ്ലൈൻഡേഴ്‌സ് എന്ന സീരിസിൽ നിന്ന് പ്രചോദനം ഉൾക്കൊണ്ട് ഒരുക്കുന്ന ചിത്രമാണ് 'ടോക്സിക്' എന്നാണ് മുൻപ് പുറത്തു വന്ന റിപ്പോർട്ടുകൾ. ചിത്രത്തിൽ നയൻതാരയും ഒരു പ്രധാന വേഷത്തിൽ എത്തുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. നിവിൻ പോളി നായകനായെത്തിയ മൂത്തോൻ എന്ന ചിത്രത്തിന് ശേഷം ​ഗീതു മോഹൻദാസ് സംവിധാനം ചെയ്യുന്ന ടോക്സിക് യഷിന്റെ പത്തൊമ്പതാമത്തെ ചിത്രം കൂടിയാണ്. എ ഫെയറി ടെയിൽ ഫോർ ഗ്രോൺ അപ്പ്സ് എന്ന ടാഗ്‌ലൈനോടെ ഒരുങ്ങുന്ന ചിത്രം നിർമിക്കുന്നത് കെവിഎൻ പ്രൊഡക്ഷൻസിന്‍റെ ബാനറില്‍ വെങ്കട്ട് കെ നാരായണയും മോൺസ്റ്റർ മൈൻഡ് ക്രിയേഷൻസും ചേർന്നാണ്.