തമിഴ് ഗായിക തനിക്കെതിരെ ഉന്നയിച്ച ആരോപണങ്ങൾ അടിസ്ഥാന രഹിതമാണെന്നും അതിനെതിരെ നിയമപരമായ നടപടിയുമായി മുന്നോട്ട് പോകുമെന്നും നടി റിമ കല്ലിങ്കൽ. ഹേമ കമ്മിറ്റി രൂപീകരിച്ചതിന്റെ ഉദ്ദേശ ശുദ്ധിയെ അധിക്ഷേപിക്കുന്നവരെ ചോദ്യം ചെയ്യുക തന്നെ വേണമെന്നും താൻ അറസ്റ്റ് ചെയ്യപ്പെട്ടു എന്നതടക്കം അവർ ഉന്നയിച്ച ആരോപണങ്ങളി‍ൽ നിയമ നടപടി സ്വീകരിക്കുമെന്നും മാനനഷ്ടത്തിന് നോട്ടിസ് അയച്ചിട്ടുണ്ടെന്നും റിമ ഇൻസ്റ്റഗ്രാമിൽ പങ്കുവച്ച പോസ്റ്റിലൂടെ അറിയിച്ചു.
റിമയുടെ പോസ്റ്റ്:
വർഷങ്ങളായി, നിങ്ങളിൽ പലരും ഡബ്ല്യുസിസിക്കും അതിൻ്റെ ലക്ഷ്യത്തിനും ഒപ്പം നിൽക്കുന്നു. ഈ പിന്തുണയും വിശ്വാസവുമാണ് ഇപ്പോൾ നിങ്ങൾക്ക് ഇത് എഴുതാൻ എന്നെ പ്രേരിപ്പിക്കുന്നത്. ഒരു യൂട്യൂബ് ചാനലിന് നൽകിയ അഭിമുഖത്തിൽ തമിഴ് ഗായിക സുചിത്ര നടത്തിയ പ്രസ്താവനകൾ കഴിഞ്ഞ രണ്ട് ദിവസമായി നിരവധി വാർത്താ മാധ്യമങ്ങൾ റിപ്പോർട്ട് ചെയ്തിരുന്നു. 30 മിനിറ്റ് നീണ്ട അഭിമുഖത്തിൽ 2017 ലെ ലൈംഗികാതിക്രമത്തെ അതിജീവിച്ചയാളെ പേരെടുത്ത് പറഞ്ഞ് അപമാനിക്കുക മാത്രമല്ല, ഇത്തരമൊരു ആക്രമണം തന്റെ നേരെ ഉണ്ടാകുമെന്നു അതിജീവിതയ്ക്ക് അറിയാമായിരുന്നു എന്നും മുഖ്യമന്ത്രി പിണറായിയും മോഹൻലാലും മമ്മൂട്ടിയും ചേർന്ന് ഹേമ കമ്മിറ്റിയിലൂടെ ഫഹദിനെപ്പോലുള്ള നടന്മാരുടെ കരിയർ നശിപ്പിക്കാനായി ഗൂഢാലോചന നടത്തിയെന്നും അവർ ആരോപിക്കുന്നു.
ഹേമ കമ്മിറ്റി രൂപീകരിച്ചതെന്ന് എന്തിനാണെന്ന് നമുക്കെല്ലാവർക്കും അറിയാം, ആ ഉദ്ദേശ ശുദ്ധിയെ അധിക്ഷേപിക്കുന്നവരെ ചോദ്യം ചെയ്യുക തന്നെവേണം. ഈ ആരോപണങ്ങൾ ഒന്നും തന്നെ മുഖ്യധാരാ മാധ്യമങ്ങളുടെ വാർത്തകളിൽ ഇടം പിടിച്ചില്ലെങ്കിലും, ഞാൻ അറസ്റ്റ് ചെയ്യപ്പെട്ടിരുന്നു എന്ന് അവർ ഏതോ ഒരു മാധ്യമത്തിൽ വായിച്ചു എന്ന അവരുടെ അടിസ്ഥാനരഹിതമായ പ്രസ്താവന വാർത്താപ്രാധാന്യം നേടി. അങ്ങനെയൊരു കാര്യം സംഭവിച്ചിട്ടില്ല എന്ന് ഞാനിപ്പോൾ വ്യക്തമാക്കാൻ ആഗ്രഹിക്കുന്നു. ഈ അടിസ്ഥാനരഹിതമായ പ്രസ്താവനയ്ക്കെതിരെ നടപടിയുമായി മുന്നോട്ട് പോകാൻ ഞാൻ തീരുമാനിച്ചു. ഈ വ്യക്തിഅധിക്ഷേപം ചൂണ്ടിക്കാട്ടി ഞാൻ പ്രത്യേക അന്വേഷണ സംഘത്തിന് പരാതി നൽകുകയും മാനനഷ്ടത്തിന് നോട്ടിസ് അയയ്ക്കുകയും ചെയ്തിട്ടുണ്ട്. ഞങ്ങൾക്ക് ഇതുവരെ തന്ന പിന്തുണയ്ക്ക് ഞങ്ങളുടെ ലക്ഷ്യത്തിൽ വിശ്വസിക്കുന്ന എല്ലാവരോടും നന്ദി, നമുക്ക് ഒരുമിച്ച് മുന്നേറാം.
കുറച്ച് ദിവസങ്ങൾക്ക് മുമ്പാണ് നടി റിമയ്ക്കും ആഷിഖ് അബുവിനുമെതിരെ കനത്ത ആരോപണങ്ങളുമായി സുചിത്ര രംഗത്ത് എത്തിയത്. റിമ കല്ലിങ്കൽ വീട്ടില്‍ ലഹരി പാര്‍ട്ടികള്‍ നടത്തുന്നുവെന്നതടക്കമുള്ള ആരോപണങ്ങൾ സുചിത്ര അഭിമുഖത്തിൽ ഉന്നയിച്ചിരുന്നു.
ഗായിക, റേഡിയോ ജോക്കി എന്നീ നിലകളില്‍ ശ്രദ്ധ നേടിയ ആളാണ് സുചിത്ര. 2017 ൽ സുചി ലീക്ക്‌സ് എന്ന ഹാഷ് ടാഗോടെ സുചിത്രയുടെ ട്വിറ്റര്‍ അക്കൗണ്ടില്‍നിന്ന് സെലിബ്രിറ്റികളുടെ സ്വകാര്യ ചിത്രങ്ങളും വീഡിയോയും പുറത്ത് പോയത് വലിയ വിവാദം തന്നെ സൃഷ്ടിച്ചിരുന്നു. മുൻ ഭർത്താവ് കാർത്തിക്, നടിനടന്മാരായ ധനുഷ്, തൃഷ, ആൻഡ്രിയ ജെറമിയ, ഐശ്വര്യ രജനികാന്ത് തുടങ്ങിയവർക്കെതിരെയും അപകീർത്തികരമായ പല ആരോപണങ്ങളും മുമ്പ് പല അഭിമുഖങ്ങളിലൂടെയും സുചിത്ര നടത്തിയിരുന്നു. അതെല്ലാം വലിയ തരത്തിലുള്ള കോളിളക്കങ്ങളും സൃഷ്ടിച്ചിരുന്നു,