വിലായത്ത് ബുദ്ധയുടെ ആക്ഷൻ സീക്വൻസിനിടെയുണ്ടായ അപകടത്തിൽ പരുക്കേറ്റ നടൻ പൃഥ്വിരാജ് സുകുമാരൻ വിശ്രമത്തിൽ. മറയൂരിലെ ചിത്രീകരണത്തിനിടെ ബസിൽ നിന്ന് ചാടിയിറങ്ങുമ്പോഴായിരുന്നു അപകടം. കൊച്ചിയിലെ ആശുപത്രിയിൽ കീ ഹോൾ ശസ്ത്രക്രിയക്ക് ശേഷം വിശ്രമത്തിലാണ് പൃഥ്വിരാജ് സുകുമാരൻ. ആക്ഷൻ സീക്വൻസിനിടെയായിരുന്നു അപകടമെന്നും ഭാഗ്യവശാൽ വിദഗ്ധ ചികിൽസയും സർജറിയും നടത്തി സുഖം പ്രാപിച്ചുവരികയാണെന്ന് പൃഥ്വിരാജ് സോഷ്യൽ മീഡിയ കുറിപ്പിലൂടെ പങ്കുവച്ചു. കുറച്ചുമാസം ഫിസിയോ തെറാപ്പിയും വിശ്രമവുമാണ് ഡോക്ടർമാർ നിർദേശിച്ചിരിക്കുന്നത്. ഈ കാലയളവ് ക്രിയാത്മകമായി പ്രയോജനപ്പെടുത്താൻ ശ്രമിക്കും. വേദനയിൽ നിന്ന് മുക്തി നേടി വേഗത്തിൽ തന്നെ ജോലിയിലേക്ക് തിരികെയെത്തുമെന്നും പൃഥ്വിരാജ്. ഈ ഘട്ടത്തിൽ ഓടിയെത്തുകയും സ്നേഹമറിയിക്കുകയും ചെയ്തവർക്കെല്ലാം നന്ദി അറിയിക്കുന്നതായും പൃഥ്വിരാജ് സുകുമാരൻ.
സന്ദീപ് സേനന്റെ നിർമ്മാണത്തിൽ ജയൻ നമ്പ്യാർ സംവിധാനം ചെയ്യുന്ന ചിത്രമാണ് വിലായത്ത് ബുദ്ധ. ബിഗ് ബജറ്റിലൊരുങ്ങുന്ന സിനിമ ഇടവേളക്ക് ശേഷമെത്തുന്ന പൃഥ്വിയുടെ മാസ് ആക്ഷൻ എന്റർടെയിനറാണ്. കാന്താരക്ക് ശേഷം അരവിന്ദ് കശ്യപ് ക്യാമറ ചലിപ്പിക്കുന്ന ചിത്രം കൂടിയാണ്. ചന്ദനക്കടത്തുകാരനായ ഡബിൾ മോഹനനെയാണ് പൃഥ്വിരാജ് അവതരിപ്പിക്കുന്നത്. മോഹനന്റെ ഗുരുവും എതിരാളിയുമായ ഭാസ്കരനായി ഷമ്മി തിലകനും വേഷമിടുന്നു. ഉർവശി തിയറ്റേഴ്സാണ് നിർമ്മാണവും വിതരണവും.
ഏറ്റവും മൂല്യമുള്ള ചന്ദനമരത്തിനായി ഗുരുവും ശിഷ്യനുമിടയിലുണ്ടാകുന്ന ഏറ്റുമുട്ടലുകളെ കേന്ദ്രീകരിച്ചാണ് ചിത്രം. ഇതേ പേരിലുള്ള ജി ആർ ഇന്ദുഗോപന്റെ കൃതിയാണ് സിനിമയാകുന്നത്. അനുമോഹൻ, ഷമ്മി തിലകൻ, പ്രിയംവദ കൃഷ്ണൻ രാജശ്രീ നായർ എന്നിവർക്കൊപ്പം ടി.ജെ. അരുണാചലം എന്ന ഇതരഭാഷാ താരവും ചിത്രത്തിൽ പ്രധാന വേഷമണിയുന്നു. ചിത്രത്തിൻ്റെ തിരക്കഥ രചിച്ചിരിക്കുന്നത് ഇന്ദുഗോപനും രാജേഷ് പിന്നാടനും ചേർന്നാണ്.
സംഗീതം - ജേക്ക്സ് ബിജോയ്. എഡിറ്റിംഗ് - ശ്രീജിത്ത് സാരംഗ്, കലാസംവിധാനം - ബംഗ്ലാൻ. മേക്കപ്പ്-മനുമോഹൻ, കോസ്റ്റ്യും ഡിസൈൻ - സുജിത് സുധാകരൻ. പ്രൊജക്റ്റ് ഡിസൈനർ - മനു ആലുക്കൽ. എക്സിക്കുട്ടീവ് പ്രൊഡ്യൂസർ -സംഗീത് സേനൻ, ലൈൻ പ്രൊഡ്യൂസർ, - രലു സുഭാഷ് ചന്ദ്രൻ. ചീഫ് അസ്സോസ്സിയേറ്റ് ഡയറക്ടർ - കിരൺ റാഫേൽ. അസ്സോസ്സിയേറ്റ് ഡയറക്ടേർസ് - മൺസൂർ റഷീദ്, വിനോദ് ഗംഗ, സഞ്ജയൻ മാർക്കോസ്. സഹസംവിധാനം - ആദിത്യൻ മാധവ്, ജിഷ്ണു വേണുഗോപാൽ.അർജുൻ.എ. പ്രൊഡക്ഷൻ എക്സിക്യൂട്ടിവ്സ്- രാജേഷ് മേനോൻ ,നോബിൾ ജേക്കബ്. പ്രൊഡക്ഷൻ കൺട്രോളർ- അലക്സ്. ഈ കുര്യൻ.