എന്തെങ്കിലും ഒരു ജോലി കിട്ടിയിരുന്നെങ്കിൽ കുറച്ചുദിവസം ലീവെടുത്ത് വീട്ടിൽ ചുമ്മാ ഇരിക്കാമായിരുന്നു. 1988 ഏപ്രിൽ 13ന് പുറത്തിറങ്ങിയ ഓർക്കാപ്പുറത്ത് എന്ന കമൽ ചിത്രത്തിലെ ഈ ഡയലോ​ഗ് മോഹൻലാലിന്റെ ഫ്രഡി അച്ഛൻ നിക്കോളാസിനോട് പറയുന്നതാണ്. മൂന്ന് പതിറ്റാണ്ടിനിപ്പുറവും മലയാളിയുടെ ദൈനംദിന സംഭാഷണങ്ങളിൽ തമാശയായി ഈ ഡയലോ​ഗ് കടന്നുവരുന്നുണ്ട്. മോഹൻലാൽ കയ്യിൽ നിന്ന് ഇട്ടതാണ് ഈ ഡയലോ​ഗ് എന്ന് സംവിധായകൻ കമൽ.

സ്ക്രിപ്റ്റിൽ ഇങ്ങനെയൊരു ഡയലോ​ഗ് ഇല്ലായിരുന്നു. രാവിലെ നെടുമുടി വേണുവിന്റെ നിക്കോളാസും മോഹൻലാലിന്റെ ഫ്രഡിയും പണിയൊന്നുമില്ലാതെ ഇരിക്കുന്നൊരു സീൻ ഉണ്ട്. സീനിൽ ലാ​ഗ് വരാതെ ഇരിക്കാൻ എന്തെങ്കിലും പറയാമോ എന്ന് ചോദിച്ചപ്പോൾ ടേക്കിൽ മോഹൻലാൽ പറഞ്ഞതാണ് സ്ക്രിപ്റ്റിൽ ഇല്ലാത്ത ഈ ഡയലോ​ഗ് എന്ന് കമൽ. കൗമുദി മുവീസ് അഭിമുഖത്തിലാണ് ഇക്കാര്യം പറയുന്നത്.

രഞ്ജിത്തിന്റെ കഥയില‍്‍ ഷിബു ചക്രവർത്തി തിരക്കഥയെഴുതിയ ചിത്രമാണ് ഓർക്കാപ്പുറത്ത്. പിയാനോയുടെ അകത്ത് മാപ്പ് സൂക്ഷിക്കുന്ന ഐഡിയ പ്രിയദർശനാണ് നിർദേശിച്ചതെന്നും കമൽ. മോഹൻലാലും സെഞ്ച്വറി കൊച്ചുമോനും ചേർന്നാണ് ഓർക്കാപ്പുറത്ത് നിർമ്മിച്ചത്.