ധ്യാന്‍ ശ്രീനിവാസനെ നായകനാക്കി സക്കീര്‍ മഠത്തില്‍ സംവിധാനം ചെയ്യുന്ന ചിത്രം ജയിലറിന്റെ ട്രെയ്‌ലര്‍ പുറത്തിറങ്ങി. പേര് പോലെ തന്നെ ഒരു ജയിലറുടെ വേഷത്തിലാണ് ചിത്രത്തില്‍ ധ്യാന്‍ ശ്രീനിവാസന്‍ എത്തുന്നത്. ജയില്‍ ചാടി രക്ഷപെടുന്ന കുറ്റവാളികളും അവര്‍ക്ക് പിന്നാലെയുള്ള ജയിലറുടെ യാത്രയുമാണ് ചിത്രം പറയുന്നത്. പിരീഡ് ത്രില്ലര്‍ വിഭാഗത്തില്‍ പെടുന്ന ചിത്രം 1956-57 കാലഘട്ടത്തില്‍ നടന്ന ഒരു സംഭവകഥയാണ് സിനിമയാക്കിയിരിക്കുന്നത്.
അഞ്ച് കൊടും കുറ്റവാളികളുടെ കൂടെ ഒരു ബംഗ്ലാവില്‍ താമസിച്ച് അവരെ വെച്ച് പുതിയൊരു പരീക്ഷണത്തിന് ശ്രമിക്കുന്ന ജയിലര്‍ ആണ് ധ്യാന്‍ അവതരിപ്പിക്കുന്ന കഥാപാത്രം. ദിവ്യ പിള്ള നായികയായി എത്തുന്ന ഈ ചിത്രത്തില്‍ മനോജ് കെ ജയന്‍, ശ്രീജിത്ത് രവി, നവാസ് വള്ളിക്കുന്ന്, ബിനു അടിമാലി, ഉണ്ണി രാജ, ജയപ്രകാശ്, ബി കെ ബൈജു, ശശാങ്കന്‍, ടിജു മാത്യു, ശാന്തകുമാരി, ആന്‍സി വിനീഷ, ബാല താരങ്ങളായ വാസുദേവ് സജീഷ് മരാര്‍, സൂര്യദേവ് സജീഷ് മാരാര്‍ തുടങ്ങിയവരും അഭിനയിച്ചിരിക്കുന്നു. ഗോള്‍ഡന്‍ വില്ലേജിന്റെ ബാനറില്‍ എന്‍ കെ മുഹമ്മദ് ആണ് ചിത്രത്തിന്റെ നിര്‍മ്മാണം.
രജനീകാന്തിനെ നായകനാക്കി തമിഴില്‍ നെല്‍സണ്‍ ദിലീപ് കുമാര്‍ സംവിധാനം ചെയ്യുന്ന ചിത്രത്തിന്റെ പേരും ജയിലര്‍ എന്ന് തന്നെയാണ്. ഇരു ചിത്രങ്ങള്‍ക്കും ഒരേ പേര് എന്ന തര്‍ക്കത്തിന്റെ ഭാഗമായി ഈ സിനിമ അടുത്തിടെ വാര്‍ത്തകളില്‍ ഇടം നേടിയിരുന്നു. തുടര്‍ന്ന് തമിഴ് ജയിലറുടെ നിര്‍മാതാക്കളായ സണ്‍ പിക്‌ച്ചേഴ്‌സ് മലയാളം ജയിലറിനോട് പേര് മാറ്റാന്‍ ആവശ്യപ്പെട്ട് വക്കീല്‍ നോട്ടീസ്് അയച്ചിരുന്നു. എന്നാല്‍ ആദ്യം പേര് രജിസ്റ്റര്‍ ചെയ്തത് മലയാളം ജയിലര്‍ ആണെന്നുള്ളതിനാല്‍ റിലീസുമായി മുന്നോട്ട് പോകാനാണ് അണിയറ പ്രവര്‍ത്തകരുടെ തീരുമാനം.