സുരാജ് വെഞ്ഞാറമൂട്, ബാബു ആന്റണി, ഭാമ അരുൺ, രാജേഷ് മാധവൻ തുടങ്ങിയവർ പ്രധാന വേഷങ്ങളിലെത്തുന്ന 'മദനോത്സവ'ത്തിന്റെ പുതിയ ടീസർ പുറത്തിറങ്ങി. ഇ. സന്തോഷ്കുമാറിന്റെ 'തങ്കച്ചൻ മഞ്ഞക്കാരൻ' എന്ന ചെറുകഥയെ ആസ്പദമാക്കി രതീഷ് ബാലകൃഷ്ണൻ പൊതുവാൾ തിരക്കഥയെഴുതി സുധീഷ് ഗോപിനാഥ് സംവിധാനം ചെയ്യുന്ന ചിത്രം തിയേറ്ററില്‍ പ്രദർശനം തുടരുന്നു.
നീണ്ട ഇടവേളയ്ക്ക് ശേഷം സീരിയസ് കഥാപാത്രങ്ങളില്‍ നിന്ന് മാറി സുരാജ് വെഞ്ഞാറമൂട് അഭിനയിക്കുന്ന ഒരു മുഴുനീളന്‍ കോമഡി ചിത്രം കൂടെയാണ് മദനോത്സവം. നാട്ടിന്‍പുറത്ത് കോഴിക്ക് കളറടിക്കുന്ന ഒരു സാധാരണക്കരന്റെ ജീവിതത്തില്‍ കടന്നു വരുന്ന പൊളിറ്റിക്കല്‍ ഇഷ്യൂവും തുടര്‍ന്ന് അത് എങ്ങനെ അയാളുടെ ജീവിതത്തെ ബാധിക്കുന്നു എന്നതുമാണ് ചിത്രത്തിന്റെ പ്രമേയം.
പി പി കുഞ്ഞികൃഷ്ണന്‍, രഞ്ജി കാങ്കോല്‍, രാജേഷ് അഴിക്കോടന്‍, ജോവല്‍ സിദ്ധിഖ്, സ്വാതിദാസ് പ്രഭു, സുമേഷ് ചന്ദ്രന്‍ എന്നിവരാണ് ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അജിത് വിനായക ഫിലിംസിന്റെ ബാനറില്‍ വിനായക അജിത് നിര്‍മിക്കുന്ന ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് ഷെഹനാദ് ജലാല്‍ ആണ്. വൈശാഖ് സുഗുണന്റെ വരികള്‍ക്ക് ക്രിസ്റ്റോ സേവിയര്‍ സംഗീതം പകരുന്നു. എഡിറ്റിംഗ് കൈകാര്യം ചെയ്തിരിക്കുന്നത് വിവേക് ഹർഷനാണ്. സൗണ്ട് ഡിസൈൻ ശ്രീജിത്ത് ശ്രീനിവാസൻ.