ടൊവിനോ തോമസിനെ നായകനാക്കി അഖില്‍ പോളും അന്‍സാര്‍ ഖാനും സംവിധാനം ചെയ്യുന്ന ഫോറന്‍സിക് ടീസര്‍ ട്രെന്‍ഡിംഗില്‍. വണ്‍ മില്യണ്‍ കാഴ്ച്ചക്കാരെയാണ് മൂന്നാം ദിവസം ടൊവിനോ ചിത്രത്തിന്റെ ടീസര്‍ സ്വന്തമാക്കിയത്. ജനുവരി 21ന് ടൊവിനോ തോമസിന്റെ പിറന്നാളിനാണ് ടീസര്‍ റിലീസ് ചെയ്തത്. മംമ്താ മോഹന്‍ദാസ് പൊലീസ് ഉദ്യോഗസ്ഥയുടെ റോളില്‍ ചിത്രത്തിലുണ്ട്. തിരുവനന്തപുരം ബര്‍മ്മാ കോളനിയില്‍ നടക്കുന്ന കൊലപാതക പരമ്പരയും സീരിയല്‍ കില്ലറിനായുള്ള അന്വേഷണവുമാണ് സിനിമ. ഫോറന്‍സിക് പശ്ചാത്തലമായി മലയാളത്തിലെത്തുന്ന ആദ്യ ചിത്രവുമാണിത്.
. വിദേശ ത്രില്ലര്‍ സിനിമകളുടെ ഫീല്‍ സമ്മാനിക്കുന്നതാണ് ടീസര്‍. പൊലീസിന് പിടികൊടുക്കാത്ത സീരിയല്‍ കില്ലറെക്കുറിച്ചുള്ള സൂചനകളാണ് സിനിമയുടെ ടീസറില്‍. ശാസ്ത്രീയ രീതിയില്‍ ഉള്ള കുറ്റാന്വേഷണത്തിന് പ്രാധാന്യം നല്‍കുന്ന ചിത്രമെന്ന സൂചനയും ടീസറിലുണ്ട്. 2020 മലയാള സിനിമയുടെ പുതുവര്‍ഷം തുടങ്ങിയത് അഞ്ചാം പാതിര എന്ന ത്രില്ലര്‍ സിനിമയുടെ ഗംഭീര വിജയത്തോടെയാണ്. മലയാളത്തിലെ ഒരുപിടി മുന്‍നിര അഭിനേതാക്കളും സംവിധായകരും ത്രില്ലറുകളുടെ പണിപ്പുരയിലുമാണ്.
സെവന്‍ത് ഡേ എന്ന സൂപ്പര്‍ഹിറ്റ് സിനിമയുടെ രചയിതാവുമാണ് അഖില്‍ പോള്‍. ഫോറന്‍സിക് ഉദ്യോഗസ്ഥനായാണ് ടൊവിനോ തോമസ് അഭിനയിക്കുന്നത്. സാമുവല്‍ ജോണ്‍ കാട്ടൂക്കാരന്‍ എന്നാണ് ടൊവിനോ അവതരിപ്പിക്കുന്ന കഥാപാത്രത്തിന്റെ പേര്. ഋതികാ സേവ്യര്‍ ഐപിഎസ് എന്ന പൊലീസ് ഓഫീസറുടെ റോളില്‍ മംമ്താ മോഹന്‍ദാസ്. മലയാളത്തില്‍ ഫൊറന്‍സിക് ഡിപ്പാര്‍ട്ട്‌മെന്റിന്റെ പശ്ചാത്തലത്തില്‍ കഥ പറയുന്ന ആദ്യ സിനിമയുമാണ് ഫോറന്‍സിക്.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
രണ്‍ജി പണിക്കര്‍, പ്രതാപ് പോത്തന്‍, അഞ്ജലി നായര്‍, സൈജു കുറുപ്പ്, ഗിജു ജോണ്‍, റേബ മോണിക്ക, ധനേഷ് ആനന്ദ്,റോണി ഡേവിഡ്, അനില്‍ മുരളി, ബാലാജി ശര്‍മ്മ, ദേവി അജിത്ത് എന്നിവരും ചിത്രത്തിലുണ്ട്
നെവിസ് സേവ്യറും സിജു മാത്യുവും ചേര്‍ന്ന് ജുവിസ് പ്രൊഡക്ഷന്‍സിന്റെ ബാനറില്‍ ഫോറന്‍സിക് നിര്‍മ്മിക്കുന്നു. രാഗം മുവീസിന്റെ ബാനറില്‍ രാജു മല്യത്തും നിര്‍മ്മാണത്തില്‍ സഹകരിക്കുന്നു. അഖില്‍ ജോര്‍ജ്ജ് ആണ് ക്യാമറ. എഡിറ്റിംഗ് ഷമീര്‍ മുഹമ്മദ്. ജേക്ക്‌സ് ബിജോയ് ആണ് മ്യൂസിക്. ദിലീപ് നാഥ് ആര്‍ട്ട്. വിഷ്ണു ഗോവിന്ദും ശ്രീശങ്കറുമാണ് സൗണ്ട് ഡിസൈന്‍. സമീറാ സനീഷ് കോസ്റ്റിയൂംസ്, രാജശേഖര്‍ ആക്ഷന്‍.