നിർമാതക്കൾ പണം മുടക്കി പ്രേക്ഷകരെ തിയറ്ററിലേക്ക് കൊണ്ടു വരേണ്ട അപകടകരമായ ഒരു പ്രവണതയാണ് മലയാള സിനിമയിൽ ഇപ്പോൾ നിലനിൽക്കുന്നത് എന്ന് നടനും തിരക്കഥാകൃത്തുമായ അനൂപ് മേനോൻ. ഇതിന് വേണ്ടി ചിലവാക്കേണ്ടി വരുന്നത് ഭീമമായ ഒരു തുകയാണ് എന്നും ഈ അവസ്ഥ സങ്കടകരമാണ് എന്നും അനൂപ് മേനോൻ പറഞ്ഞു. ചെക്ക്മേറ്റ്' എന്ന സിനിമയുടെ ആദ്യ പ്രദർശനം കഴിഞ്ഞ് മാധ്യമങ്ങളോട് സംസാരിക്കവെയാണ് പ്രതികരണം.

അനൂപ് മേനോൻ പറഞ്ഞത്:

റിവ്യൂസിലൊക്കെ പറയുന്നത് പോലെ ടെക്നിക്കലി വളരെ ബ്രില്യന്റായ ഒരു സിനിമ ഇവിടെയുണ്ടായി. എന്നാൽ അതിന് അനുസരിച്ചുള്ള ഒരു പിന്തുണ നമ്മുടെ ഭാ​ഗത്ത് നിന്ന് ഉണ്ടോയെന്ന് കാര്യം സംശയമാണ്. ഇത് രണ്ടാമത്തെ ദിവസമാണ്. മലയാള സിനിമയിൽ ഇപ്പോൾ കണ്ടുവരുന്ന ഒരു ട്രെന്റ് എന്താണെന്നു വച്ചാൽ ആദ്യത്തെ രണ്ട് ദിവസം കാശ് കൊടുത്ത് തിയറ്ററിൽ ആളെ കൊണ്ടുവരണം എന്നാലെ തിയറ്ററിൽ ആളുള്ളൂ എന്ന അവസ്ഥയാണ്. മാർക്കറ്റിം​ഗിന് വേണ്ടിയുള്ള ബഡ്ജറ്റിൽ നിന്നും വലിയൊരു ഭാ​ഗം തിയറ്ററിലേക്ക് ആളെകൊണ്ടു വരാൻ വേണ്ടി ഉപയോ​ഗിക്കുന്നു എന്നതാണ്. അത് വളരെ അപകടകരവും സങ്കടകരവുമായ അവസ്ഥയാണ്. അതിനുള്ള സാമ്പത്തിക ഭ​ദ്രത ഈ കുട്ടികൾക്ക് ഇല്ലാത്തത് കൊണ്ടു തന്നെ അങ്ങനെയൊരു കാര്യം നമ്മൾ ചെയ്തിട്ടില്ല. അങ്ങനെ ചെയ്യേണ്ടി വരും. അല്ലെങ്കിൽ ഇത്തരം സിനിമകൾക്ക് ഇവിടെ ഇടം കിട്ടാതെയാകും. വളരെ അപകടകരമായ ഒരു അവസ്ഥയിലൂടെയാണ് സിനിമ കടന്നു പോകുന്നത് എന്നാണ് എനിക്ക് തോന്നുന്നത്. ഈ വർഷം നമുക്ക് ഒരുപാട് വലിയ ഹിറ്റ് സിനിമകൾ ഉണ്ടായി പക്ഷേ ഹിറ്റുകളാവാത്ത ഒരുപാട് സിനിമകൾ ഇനിയും ഇരിക്കുന്നു. ഒടിടി എന്നത് തന്നെ ഏകദേശം പൂർണ്ണമായും ഇല്ലാതെയായിരിക്കുന്നു. വലിയ സന്തോഷമുള്ളത് ഈ സിനിമയുടെ റിവ്യൂസ് എല്ലാം പോസ്റ്റീവ് ആണ് എന്നതാണ്.

പ്രേക്ഷകർ കണ്ട് മറ്റു പ്രേക്ഷകരിലേക്ക് എത്തുക എന്നല്ലാതെ ഒരു സിനിമ വിജയിക്കാൻ മറ്റൊരുവിധ മാർ​ഗവുമില്ല. കഴിഞ്ഞ നാലു വർഷങ്ങൾ ഈ സിനിമക്ക് വേണ്ടി കഷ്ടപ്പെട്ട അമേരിക്കൻ മലയാളികളായ സുഹൃത്തുക്കളാണ് ചെക്ക്മേറ്റ് എന്ന സിനിമക്ക് പിന്നിൽ. ഇവർ എല്ലാവരും ജോലിയുള്ള ആൾക്കാരാണ്. അവർ എത്ര തന്നെ ശ്രമിച്ചിട്ടും ഇവിടുത്തെ വലിയ വിതരണക്കാരൊന്നും ഈ സിനിമ വാങ്ങാൻ തയ്യാറായില്ല. ട്രെയ്ലർ ലോഞ്ച് ചെയ്യാൻ പോലും ഒരു വലിയ പേരുകാരും മുന്നോട്ടു വന്നില്ല. അതൊക്കെ വലിയ വിഷമമുണ്ടാക്കിയ കാര്യങ്ങളാണ്. ഇന്നലെ പ്രദർശനത്തിനെത്തിയ ഈ ചിത്രത്തിന് മികച്ച അഭിപ്രായങ്ങളാണ് ലഭിക്കുന്നത്. അത് വളരെ സന്തോഷമുള്ള കാര്യമാണ്. പക്ഷെ അതെല്ലാം ടിക്കറ്റുകളായി മാറുമോ എന്നതിൽ ഇനിയും ഒരുറപ്പും പറയാനാവില്ലെന്ന അവസ്ഥയാണ്.

ചെക്ക്മേറ്റ് ഒരു സാധാരണ സിനിമയല്ല. ഈ സിനിമക്ക് ഒരു പൂർവ്വ മാതൃകയുമില്ല. ഇതുപോലൊരു സിനിമ സംഭവിക്കുന്നത് ഇവിടെ ആദ്യമാണ്. അതുകൊണ്ടുതന്നെ ഈ സിനിമയെ കാണാനും വിശ്വസിക്കാനും അം​ഗീകരിക്കാനും ഒരു കാലതാമസം പ്രേക്ഷകരുടെ ഭാ​ഗത്ത് ഉണ്ടാകും. അത് എത്രയും വേ​ഗം അവസാനിച്ച് പ്രേക്ഷകർ തിയറ്ററിലേക്ക് എത്തുമെന്ന് പ്രതീക്ഷിക്കുന്നു. അനൂപ് മേനോൻ പറഞ്ഞു