ഒടിയന്‍ എന്ന സിനിമയിലെ ഏനൊരുവന്‍ എന്ന ഗാനത്തിന് റെഡ് എഫ് എം മ്യൂസിക് അവാര്‍ഡ് സ്വീകരിക്കുന്ന ചിത്രം മോഹന്‍ലാല്‍ ഫേസ്ബുക്കില്‍ ഷെയര്‍ ചെയ്തിരുന്നു. മികച്ച ഗായകനുള്ള പുരസ്‌കാരം കവിയൂര്‍ പൊന്നമ്മയില്‍ നിന്ന് സ്വീകരിച്ചെന്നായിരുന്നു കാപ്ഷന്‍. ഇതിന് പിന്നാലെ മോഹന്‍ലാലിനെ വിമര്‍ശിച്ചുള്ള ട്രോളുകള്‍ പ്രചരിച്ചു.
2019ലെ മികച്ച ഗായകനായി മോഹന്‍ലാലിനെ തെരഞ്ഞെടുത്തതിനെ വിമര്‍ശിച്ചായിരുന്നു ട്രോളുകള്‍. ഫേസ്ബുക്ക് പോസ്റ്റില്‍ വന്ന പിഴവാണ് വിനയായത്. മികച്ച സെലിബ്രിറ്റി സിംഗര്‍ക്കുള്ള പുരസ്‌കാരമാണ് മോഹന്‍ലാലിന് ലഭിച്ചത്.
ബെസ്റ്റ് സെലിബ്രിറ്റി സിംഗര്‍ എന്നതിന് പകരം സിംഗര്‍ എന്ന് വന്നതാണ് ട്രോളന്‍മാര്‍ ചാകരയാക്കിയത്. സെലിബ്രിറ്റി സിംഗര്‍ എന്ന് പിന്നീട് പോസ്റ്റില്‍ തിരുത്തിയിട്ടുണ്ട്.
എം ജയചന്ദ്രനാണ് മികച്ച സംഗീത സംവിധായകനുള്ള റെഡ് എഫ്എം അവാര്‍ഡ് ലഭിച്ചത്. കൂടെ ന്നെ ചിത്രത്തിലെ വാനവില്ലേ എന്ന ഗാനത്തിന്.
ഏനൊരുവന്‍ മുടിയഴിച്ചിങ്ങാടണ് എന്ന ഗാനം പ്രഭാവര്‍മ്മ എഴുതി എം ജയചന്ദ്രന്‍ ഈണമിട്ടതാണ്. വി എ ശ്രീകുമാര്‍ മേനോന്‍ സംവിധാനം ചെയ്ത ഒടിയനില്‍ നായകന്‍ മാണിക്യന്‍ പാടുന്നതായാണ് പാട്ട് ചിത്രീകരിച്ചിരിക്കുന്നത്.