അമേരിക്കയുടെ ചരിത്രത്തിലിടം പിടിക്കുന്ന, പ്രധാനപ്പെട്ട ദിവസങ്ങളാണ് ഇനി വരാന്‍ പോകുന്നത്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ഇംപീച്ച്‌മെന്റുമായി ബന്ധപ്പെട്ട വിചാരണയും, പ്രസിഡന്റ് തെരഞ്ഞെടുപ്പുമെല്ലാം ഇങ്ങെത്തിക്കഴിഞ്ഞു. താനെന്തു ചെയ്താലും ചരിത്രത്തിലിടം പിടിക്കണമെന്ന് വാശിപിടിക്കുന്ന ട്രംപിന്, തന്റെ ഭരണത്തിന്റെ അവസാന കാലഘട്ടില്‍ ലഭിച്ച റെക്കോര്‍ഡാണ് ഈ ഇംപീച്ച്മെന്റ്. അമേരിക്കയുടെ ചരിത്രത്തില്‍ ജനപ്രതിനിധി സഭ ഇംപീച്ച് ചെയ്യുന്ന മൂന്നാമത്തെ പ്രസിഡന്റായിരിക്കുകയാണ് ട്രംപ്. എന്നാല്‍ ജനപ്രതിനിധി സഭ ട്രംപിനെതിരെ കുറ്റം ചുമത്തിയെങ്കിലും, റിപ്പബ്ലിക്കന്‍ പാര്‍ട്ടിക്ക് ഭൂരിപക്ഷമുള്ള സെനറ്റില്‍ ട്രംപിനെതിരെയുള്ള നീക്കം പാസാകാനുള്ള സാധ്യത വളരെ കുറവ് മാത്രമാണ്.