ദുബായ് ഗ്ലോബല്‍ വില്ലേജില്‍ സന്ദർശകത്തിരക്ക്. ഗ്ലോബല്‍ വില്ലേജിന്‍റെ 29 മത് പതിപ്പാണ് ഇത്തവണത്തേത്. 30 പവലിയനുകളാണ് ഇത്തവണയുളളത്. മൂന്ന് സാംസ്കാരിക പവലിയനുകളും ഒരു റസ്റ്ററന്‍റ് പ്ലാസയും ഉള്‍പ്പെടുത്തിയാണ് ഇത്തവണ ഗ്ലോബല്‍ വില്ലേജ് തുറന്നത്. റെയില്‍ വേ മാർക്കറ്റ്, ഫീയസ്റ്റ സ്ട്രീറ്റ്, ഫ്ളോട്ടിങ് മാർക്കറ്റ് എന്നിവയും ഇത്തവയുണ്ട്. ഇവിടെയെല്ലാം നിരവധിപേരാണ് ഓരോ തവണയുമെത്തുന്നത്.
ദീപാവലി ആഘോഷമാക്കാന്‍ നിരവധിപേരാണ് ഇത്തവണയെത്തിയത്. വലിയ രംഗോലിയൊരുക്കിയും പ്രത്യേക വെടിക്കെട്ട് നടത്തിയുമാണ് ഗ്ലോബല്‍ വില്ലേജ് ദീപാവലി ആഘോഷത്തില്‍ പങ്കുചേർന്നത്. ദീപാവലിയോട് അനുബന്ധിച്ച് പ്രത്യേക സ്റ്റാളുകളും ഒരുക്കിയിരുന്നു.
ഹൗസ് ഓഫ് ഫിയർ ഉള്‍പ്പടെ 200 ഓളം റൈഡുകളും ഗെയിമുകളും ഒരുക്കിയിട്ടുണ്ട്. സൈബർ സിറ്റി സ്റ്റണ്ട് ഷോ ഡെയ്ഞ്ചർ സോണിലേക്കുളള പ്രവേശന നിരക്ക് 20 ദിർഹമാണ്.
പ്രവേശന നിരക്കുകള്‍ ഇപ്രകാരമാണ്.
പ്രതിവാര ടിക്കറ്റിന് 25 ദിർഹമാണ് വില ( പൊതു അവധി ദിവസങ്ങൾ ഒഴികെ ഞായർ മുതൽ വ്യാഴം വരെ സാധുത.) 30 ദിർഹം നല്‍കിയാല്‍ ഏത് ദിവസവും പ്രവേശിക്കാന്‍ കഴിയുന്ന ടിക്കറ്റ് ലഭിക്കും.
3 വയസ്സും അതിൽ താഴെയും പ്രായമുള്ള കുട്ടികൾക്കും 65 വയസ്സിനു മുകളിലുള്ള മുതിർന്നവർക്കും ഭിന്നശേഷിയുള്ളവർക്കും പ്രവേശനം ഇപ്പോഴും സൗജന്യമാണ്. കഴിഞ്ഞ വർഷം 10ദശലക്ഷം പേരാണ് ആഗോളഗ്രാമത്തിലെ കാഴ്ചകള്‍ കാണാനായി എത്തിയത്.
ഗ്ലോബൽ വില്ലേജ് ഈ സീസൺ അടുത്ത വർഷം മേയിലാണ് സമാപിക്കുക. ഞായർ മുതൽ ബുധന്‍ വരെ വൈകിട്ട് 4 മുതൽ പിറ്റേന്ന് പുലർച്ചെ 12 വരെ. വ്യാഴം മുതൽ ശനി വരെ വൈകിട്ട് 4 മുതൽ പുലർച്ചെ ഒന്നുവരെ.