കൊല്ലം അഞ്ചലില്‍ ആര്‍എസ്എസ് ആക്രമണം ഭയന്ന് ഇറച്ചിക്കടകളും നോണ്‍ വെജിറ്റേറിയന്‍ ഹോട്ടലുകളും അടച്ചിട്ട് ഉടമകള്‍. ശ്രീകൃഷ്ണ ജയന്തി ദിനത്തില്‍ മാംസവും മാംസാഹാരവും വില്‍ക്കരുതെന്ന സംഘ്പരിവാര്‍ ഭീഷണി ഇക്കൊല്ലം ബേക്കറികളിലും എത്തി. രാവിലെ ഏഴ് മണി മുതല്‍ വൈകിട്ട് ഏഴ് മണി വരെ ചിക്കന്‍ വില്‍ക്കരുതെന്ന് പറഞ്ഞതിനാല്‍ തുറന്നില്ലെന്നും കഴിഞ്ഞ വര്‍ഷം ആര്‍എസ്എസ് പ്രവര്‍ത്തകര്‍ കട തല്ലിത്തകര്‍ത്ത അനുഭവമുള്ളതിനാലാണ് അടച്ചിട്ടതെന്നും അഞ്ചലിലെ ബിസ്മില്ല ചിക്കന്‍ സ്റ്റാള്‍ ഉടമ അന്‍ഷാദ് 'ദ ക്യൂ'വിനോട് പറഞ്ഞു.

അന്‍ഷാദ് പറഞ്ഞത്

“വ്യാഴാഴ്ച്ച വൈകിട്ട് ഒരു മൂന്ന് പേര്‍ കടയില്‍ വന്നു. വെള്ളിയാഴ്ച്ച രാവിലെ ഏഴ് മണി മുതല്‍ വൈകിട്ട് ഏഴ് മണി വരെ ഒരു കോഴിയെ പോലും കട്ട് ചെയ്യരുതെന്ന് പറഞ്ഞു. 12-13 ചിക്കന്‍ സ്റ്റാളുകളുണ്ട് അഞ്ചല്‍ ടൗണില്‍. ഒട്ടുമിക്കവയും മുസ്ലീംസ് നടത്തുന്നവയാണ്.

കഴിഞ്ഞ വര്‍ഷം ആര്‍എസ്എസുകാര്‍ എന്റെ കട അടിച്ചു തകര്‍ത്തു. നാട്ടില്‍ തന്നെയുള്ളവരാണ്. ഉത്സവത്തിന്റെ പിരിവുമായി ബന്ധപ്പെട്ടാണ് പ്രശ്‌നങ്ങളുടെ തുടക്കം. പിരിവ് കൊടുത്തിരുന്നു. ദീപാലങ്കാരത്തിന് വേറെ പിരിവുണ്ട് അതിന് പണം തരണമെന്ന് പറഞ്ഞ് വന്നു. കൊടുക്കാന്‍ തയ്യാറായിരുന്നു. ഞായറാഴ്ച്ച വൈകുന്നേരമായതുകൊണ്ട് തിരക്കായിരുന്നു. നാളെത്തരാം എന്നു പറഞ്ഞപ്പോള്‍ അവര്‍ ടേബിളില്‍ അടിച്ച് ഇപ്പോള്‍ തന്നെ വേണമെന്ന് പറഞ്ഞ് ബഹളമുണ്ടാക്കി. അവരെ ഇറക്കിവിട്ടു. അവര്‍ പോയി ശാഖയിലുണ്ടായിരുന്ന എല്ലാവരേയും വിളിച്ചുകൊണ്ടുവന്നു. വടിയൊക്കെയായി വന്ന് എല്ലാം അടിച്ചുതകര്‍ത്തു. രാത്രി ഫാമില്‍ കോഴിയെ എടുക്കാനായി പോകാന്‍ നിന്ന രണ്ട് സ്റ്റാഫുകളെ പിടിച്ച് അടിച്ചു. ഞാന്‍ ആ സമയത്ത് വീട്ടിലായിരുന്നു. കേസ് കൊടുത്തു. 4-5 പേര്‍ റിമാന്‍ഡിലായി.

അഞ്ചല്‍ മുക്കട ജംഗ്ഷനില്‍ ആര്‍എസ്എസിന്റെ കാര്യാലയമുണ്ട്. ഇന്നലെ എന്റെ സ്റ്റാള്‍ തുറന്നില്ല. അവര്‍ കൂട്ടത്തോടെയാകും വരിക. അവര്‍ വേറൊന്നും നോക്കില്ലല്ലോ. നമുക്ക് അങ്ങനെ പറ്റത്തില്ല. ആരും പ്രതികരിക്കുന്നില്ല എന്നതാണ് പ്രശ്‌നം. ആരും ഒന്നും പറയില്ല.”

കുറച്ച് പേര്‍ മാത്രമാണ് എതിര്‍ത്ത് സംസാരിക്കുന്നതെന്നും കടയുടമകള്‍ക്ക് ജനങ്ങളുടെയോ രാഷ്ട്രീയപാര്‍ട്ടികളുടെയോ പിന്തുണയില്ലെന്നും അഞ്ചല്‍ സ്വദേശിയായ മഹേഷ് ഷാജഹാന്‍ 'ദ ക്യൂ'വിനോട് പറഞ്ഞു.

ഇങ്ങനെയൊക്കെ സംസാരിക്കുന്നതുകൊണ്ട് താനിപ്പോള്‍ അവരുടെ നോട്ടപ്പുള്ളിയാണ്. പേരിനൊപ്പം ഷാജഹാന്‍ എന്നുള്ളതുകൊണ്ട് മുസ്ലീമാണെന്ന് അവര്‍ കരുതിയിരുന്നു. ക്ഷേത്ര സംരക്ഷണ സമിതി നേതാവ് മതസ്പര്‍ദ്ധ വളര്‍ത്തിയെന്ന് ആരോപിച്ച് തനിക്കെതിരെ കേസ് കൊടുത്തെന്നും മഹേഷ് ചൂണ്ടിക്കാട്ടി.

അഞ്ചലിലെ ബേക്കറിയില്‍ ഇന്നലെ ഭക്ഷണം കഴിക്കാന്‍ എത്തിയവര്‍ക്ക് ഉടമ നോണ്‍ വെജ് ആഹാരം നല്‍കാന്‍ വിസമ്മതിച്ചതിനേത്തുടര്‍ന്ന് വാക്കു തര്‍ക്കമുണ്ടായിരുന്നു. അഞ്ചലിലെ മാംസാഹാരവിലക്ക് യാഥാര്‍ത്ഥ്യമാണെന്ന് മനസിലായത് അനുഭവമുണ്ടായപ്പോഴാണെന്ന് പേര് വെളിപ്പെടുത്താന്‍ ആഗ്രഹിക്കാത്ത കസ്റ്റമര്‍ 'ദ ക്യൂ'വിനോട് പ്രതികരിച്ചു.

ഇങ്ങനൊരു സമ്പ്രദായം നമ്മുടെ നാട്ടില്‍ ഇല്ലല്ലോയെന്നും ആദ്യമായിട്ടാണ് ഇങ്ങനയൊരു അനുഭവമെന്നും പറഞ്ഞു. ഇതിനിടയില്‍ ഭക്ഷണം കഴിക്കാനെത്തിയ കുടുംബങ്ങള്‍ പലരും ഇറങ്ങിപ്പോകുന്നുണ്ട്. ഇത് കേരളമാണ്. ഉത്തരേന്ത്യയല്ല. എല്ലാവര്‍ക്കും ഭക്ഷണം കഴിക്കാന്‍ സ്വാതന്ത്ര്യമുണ്ട് എന്നെല്ലാം പറഞ്ഞ ശേഷം ഇറങ്ങി. ബേക്കറിയുടമ പിന്നാലെ വന്ന് ഭീഷണിയുടെ കാര്യം പറഞ്ഞു. പൊലീസില്‍ അറിയിച്ചപ്പോള്‍ പരമാവധി പ്രശ്‌നം ഒഴിവാക്കാനാണ് നിര്‍ദ്ദേശിച്ചതെന്നും സിസി ടിവി ദൃശ്യങ്ങള്‍ അവര്‍ കൊണ്ടുപോയെന്നും ബേക്കറിയുടമ ഞങ്ങളോട് പറയുകയുണ്ടായി.

നമ്മുടെ നാട്ടില്‍ നടക്കാന്‍ പാടില്ലാത്തതാണ്. ഇങ്ങനൊരു സംഭവം നടക്കുന്നുണ്ടെന്ന കാര്യം പുറത്തുവരണം. നോണ്‍ വെജ് ഭക്ഷണം കിട്ടുന്ന പകുതിയോളം കടകളാണ് ഇന്നലെ അടച്ചിട്ടത്. ഫേസ്ബുക്കിലും വാട്‌സാപ്പിലും കണ്ടിരുന്നെങ്കിലും നമ്മുടെ നാട്ടില്‍ ഇങ്ങനൊന്നും നടക്കില്ലല്ലോ എന്നാണ് കരുതിയിരുന്നതെന്നും കസ്റ്റമര്‍ കൂട്ടിച്ചേര്‍ത്തു.