നടിയെ അക്രമിച്ച കേസിലെ അന്വേഷണ ഉദ്യോഗസ്ഥരെ വധിക്കാന്‍ ഗൂഢാലോചന കേസിലെ എഫ്.ഐ.ആര്‍ റദ്ദാക്കണമെന്നാവശ്യപ്പെട്ട് നടന്‍ ദിലീപ് ഹൈക്കോടതിയില്‍. തെളിവുകളില്ലെന്നാണ് ചൂണ്ടിക്കാണിച്ചാണ് ദിലീപ് എഫ്.ഐ.ആര്‍ റദ്ദാക്കണമെന്ന് ആവശ്യപ്പെട്ടിരിത്തുന്നത്. എഫ്.ഐ.ആര്‍ റദ്ദാക്കിയില്ലെങ്കില്‍ അന്വേഷണം സി.ബി.ഐക്ക് കൈമാറണമെന്നും ദിലീപ് ആവശ്യപ്പെട്ടു.
ക്രൈംബ്രാഞ്ച് തനിക്കെതിരെ കേസ് കെട്ടിച്ചമച്ചതാണ്. അന്വേഷണ ഉദ്യോഗസ്ഥനായ ബൈജു പൗലോസും സംവിധായകന്‍ ബാലചന്ദ്രകുമാറും തനിക്കെതിരെ ഗുഢാലോചന നടത്തിയെന്നും ദിലീപ് ആരോപിക്കുന്നു. ബി. സന്ധ്യയുടെയും എസ്.ശ്രീജിത്തിന്റേയും അറിവോടെയാണ് ഗുഢാലോചന നടന്നിരിക്കുന്നത്.
വധഗൂഢാലോചന കേസില്‍ ദിലീപ് ഉള്‍പ്പെടെയുള്ളവര്‍ക്ക് ഹൈക്കോടതി മുന്‍കൂര്‍ ജാമ്യം അനുവദിച്ചിരുന്നു. അന്വേഷണവുമായി സഹകരിക്കണമെന്ന് കോടതി നിര്‍ദേശിച്ചിരുന്നു. ബാലചന്ദ്രകുമാര്‍ ഹാജരാക്കിയ തെളിവുകളിലെ ശബ്ദം ദിലീപിന്റെത് തന്നെയാണോയെന്ന് ഉറപ്പിക്കാനുള്ള പരിശോധന കഴിഞ്ഞ ദിവസം നടന്നിരുന്നു.
ദിലീപിനെതിരെ കൂടുതല്‍ തെളിവ് ശേഖരിക്കാനുള്ള ശ്രമത്തിലാണ് അന്വേഷണ സംഘം. ഫോണുകള്‍ ഫോറന്‍സിക് പരിശോധനയ്ക്ക് അയച്ചിരിക്കുകയാണ്.