യുഎഇ അറ്റാഷെ രാജ്യം വിട്ടതിന് പിന്നാലെ യുഎഇ കോണ്‍സലേറ്റ ഗണ്‍മാനെ കാണാതായി. എസ് ആര്‍ ജയഘോഷിനെ കാണാനില്ലെന്ന് കാട്ടി ബന്ധുക്കള്‍ തുമ്പ പൊലീസ് സ്റ്റേഷനില്‍ പരാതി നല്‍കി. സ്വര്‍ണ്ണക്കടത്തും വിവാദവുമുണ്ടായ ജൂലൈ 3,4,5 തിയതികളില്‍ സ്വപ്‌ന സുരേഷ് ജയഘോഷിനെ വിളിച്ചതായി തെളിവ് ലഭിച്ചിരുന്നു.

അറ്റാഷേ ഇന്ത്യ വിട്ടതിന് ശേഷം ഗണ്‍മാന്‍ ജയഘോഷ് തോക്ക് തിരികെ ഏ ആര്‍ ക്യാമ്പില്‍ ഏല്‍പ്പിച്ചിരുന്നില്ല. പൊലീസ് സംഘം ജയഘോഷിന്റെ വീട്ടിലെത്തി തോക്ക് തിരികെ വാങ്ങുകയായിരുന്നു. സ്വര്‍ണ്ണക്കടത്ത് കേസില്‍ ചോദ്യം ചെയ്യാനായി എന്‍ഐഎയും കസ്റ്റംസും അപേക്ഷ നല്‍കിയതിന് പിന്നാലെയാണ് അറ്റാഷേ ന്യൂഡല്‍ഹി വഴി യുഎഇയിലേക്ക് തിരിച്ചുപോയത്.

സ്വര്‍ണ്ണക്കടത്ത് കേസില്‍ നിര്‍ണായക തെളിവുകള്‍ ലഭിച്ചതിന് തൊട്ടുപിന്നാലെയാണ് അറ്റാഷേ പോയത്. അറ്റാഷെയെ ചോദ്യം ചെയ്യണമെന്ന അപേക്ഷയില്‍ യുഎഇ എംബസി പ്രതികരിച്ചിരുന്നില്ല.