ട്വിറ്ററില്‍ നിന്ന് 100 തൊഴിലാകളെ പിരിച്ചുവിട്ടു. എച്ച്.ആര്‍ ടീമില്‍ നിന്ന് 30 ശതമാനം തൊഴിലാളികളെയാണ് ട്വിറ്റര്‍ പിരിച്ചുവിട്ടത്. ഇലോണ്‍ മസ്‌ക് ട്വിറ്റര്‍ ഏറ്റെടുക്കുമെന്ന് പ്രഖ്യാപിച്ചതിന് ശേഷം ആദ്യമായാണ് ഇത്രയും തൊഴിലാളികളെ പിരിച്ചുവിടുന്നത്.
ട്വിറ്ററിന്റെ സാമ്പത്തിക ആരോഗ്യം മെച്ചപ്പെടുത്തണമെന്നും അതിനായി ചെലവു ചുരുക്കല്‍ നടപടികളിലേക്ക് കടക്കേണ്ടി വരുമെന്നും കമ്പനിയിലെ തൊഴിലാളികളുമായി ജൂണില്‍ നടത്തിയ ആദ്യ യോഗത്തില്‍ ഇലോണ്‍ മസ്‌ക് പറഞ്ഞിരുന്നു. വരുമാനത്തേക്കാള്‍ ചെലവ് കൂടിയെന്നും പിരിച്ചുവിടല്‍ സാധ്യതയുണ്ടെന്നും മസ്‌ക് അറിയിച്ചിരുന്നു.
നേരത്തെ ട്വിറ്ററിന്റെ റിക്രൂട്ട്‌മെന്റ് നടപടികള്‍ നിര്‍ത്തിവെച്ചിരുന്നു. എന്നാല്‍ ഇപ്പോഴുള്ള നടപടി മസ്‌കിന്റെ ഇടപെടലുകൊണ്ടല്ലെന്നും റിപ്പോര്‍ട്ടുകളുണ്ട്.
കമ്പനിയുടെ പിരിച്ചുവിടല്‍ നടപടികള്‍ ഇന്ന് തുടങ്ങി. ജോലി നഷ്ടപ്പെടുന്നവര്‍ ഒരു ദശകത്തിലേറെയായി ട്വിറ്ററില്‍ ജോലി ചെയ്യുന്നവരാണ്. തീര്‍ച്ചയായും ഒരു ബുദ്ധിമുട്ടുള്ള ദിവസമാണെന്നും ട്വിറ്ററിലെ സീനിയര്‍ ടെക്‌നിക്കല്‍ റിക്രൂട്ടര്‍ ഇന്‍ഗ്രിഡ് ജോണ്‍സണ്‍ ലിങ്ക്ഡ് ഇനില്‍ പറഞ്ഞു.