പേര് മീശക്കാരി, വയസ്സ് 33, ഭര്‍ത്താവ് 1, കുട്ടികള്‍ 1, പ്രണയം 1, മീശ ഒര്‍ജിനലാണ്. വേള്‍ഡ് മലയാളി സര്‍ക്കിള്‍ എന്ന ഫേസ്ബുക്ക് ഗ്രൂപ്പില്‍ പരിചയപ്പെടുത്തി കുറിപ്പിട്ടതോടെയാണ് കണ്ണൂര്‍ക്കാരി ഷൈജയുടെ മീശ സോഷ്യല്‍ മീഡിയയില്‍ വൈറലായത്. ഭൂരിഭാഗം പേരും പിന്തുണച്ചെങ്കിലും വിമര്‍ശിച്ചവരോടും ദേഷ്യമില്ലെന്നും പോസിറ്റീവായി എടുക്കുന്നുവെന്ന് ഷൈജ പറയുന്നു. മീശയെക്കുറിച്ച് ആര് പറഞ്ഞാലും കാര്യമാക്കില്ല. വീട്ടുകാര്‍ക്കും ഭര്‍ത്താവിനും മകള്‍ക്കും ഇല്ലാത്ത വിഷമം മറ്റുള്ളവര്‍ക്കെന്തിനാണെന്ന് ഷൈജ ചോദിക്കുന്നു.

ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം

കണ്ണൂര്‍ കൂത്തുപറമ്പ് കോളയാട് സ്വദേശിനിയാണ് ഷൈജ. വയറിംഗ് തൊഴിലാളിയായ ഭര്‍ത്താവും മകളും അച്ഛനും അമ്മയും സഹോദരനും അടങ്ങുന്ന കുടുംബം ഷൈജയുടെ മീശയ്ക്ക് പൂര്‍ണ പിന്തുണ പ്രഖ്യാപിച്ചിട്ടുണ്ട്. മകളെ സ്‌കൂളില്‍ ചേര്‍ക്കാന്‍ പോയപ്പോള്‍ എല്ലാവരും നോക്കി ചിരിച്ചു. കാര്യമാക്കിയില്ലെന്നും ഷൈജ പറഞ്ഞു.

പൊടിമീശക്കാലത്ത് കൂടെ പഠിക്കുന്നവര്‍ കളിയാക്കുമെങ്കിലും കാര്യമാക്കിയില്ലെന്ന് ഷൈജ പറയുന്നു. പത്ത് വര്‍ഷമായി മീശ കനത്തിട്ട്. സുഹൃത്തിന്റെ ബ്യൂട്ടിപാര്‍ലറില്‍ പോകുമ്പോള്‍ അവിടെ മീശയും താടിയും കളയാനായി എത്തുന്ന സ്ത്രീകളെ കാണാറുണ്ട്. നല്ല വേദന സഹിച്ചും ഇതെന്തിനാണ് ചെയ്യുന്നതെന്ന് ചോദിക്കുമ്പോള്‍ ഭയങ്കര ബോറാണെന്നാണ് മറുപടി ലഭിക്കുക. ഞാനിത് കുറെ കേട്ടതാണ്. നമ്മുടെ ശരീരത്തിന്റെ ഭാഗമായതല്ലേ.

ഒരു സര്‍ജറി ചെയ്യാന്‍ പോയപ്പോള്‍ മീശ എടുത്ത് കളഞ്ഞാലോയെന്ന് ഡോക്ടര്‍ ചോദിച്ചു. പിന്നെ എന്തിനാ ജീവിച്ചിരിക്കുന്നതെന്ന് തിരിച്ച് ചോദിച്ചു. ബിപി കൂട്ടേണ്ട, ഓപ്പറേഷന്‍ ചെയ്യേണ്ടതല്ലേയെന്ന് ഡോക്ടര്‍ പറഞ്ഞു. മുഖത്ത് വരുന്ന കുറച്ച് രോമം നിങ്ങള്‍ക്ക് ബുദ്ധിമുട്ടുണ്ടാക്കുന്നില്ലെങ്കില്‍ എന്തിനാണ് കളയുന്നതെന്നാണ് ഷൈജ മീശക്കാരികളോട് ചോദിക്കുന്നത്. മീശക്കാരിയെന്ന് കുറച്ച് കാലം വിളിക്കും. അത് അവഗണിക്കുക. മറ്റുള്ളവരെ നോക്കി ജീവിക്കാനാവില്ല. നമ്മള്‍ നമ്മുടെ ഇഷ്ടത്തിനാണ് ജീവിക്കേണ്ടത്.

ദ ക്യു പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം